2015-02-10 10:56

საქართველოს პარლამენტის ყოფილი სპიკერი ვახტანგ რჩეულიშვილი წერს, რომ იური ვაზაგაშვილის მკვლელობაზე არანაკლებ დაძაბა დანაშაულის გახსნამ და იმან, რომ დანაშაულში მოქმედი პოლიციელი ამხილეს.

რჩეულიშვილი წერს, რომ როცა სასამართლო დასრულდება, მეუღლესთან ერთად წავა საზღვარგარეთ, რასაც აქამდე არ აპირებდა:

„ვაზაგაშვილის საზარელმა მკვლელობამ (შვილის საფლავზე აფეთქებამ!) ხომ მაგრა დამძაბა, მაგრამ მისმა გახსნამ - კიდევ უარესად.

შევარდნაძის გუნდში ჩემი ყოფნის დროს უარესიც ხდებოდა (სამართალდამცავების მიერ მომზადებულ ტერაქტებს და მკვლელობებს ვგულისხმობ), მაგრამ თუ დღესაც ამის საშიშროება არსებობდა, ნამდვილად აღარ მეგონა.

მიუხედავად იმისა, რომ შევარდნაძეც და უწმინდესიც გვაფრთხილებდნენ მე და მაიას „ცენტრ-პოინტის“ დაყაჩაღების დროს,რომ ქონებას კი ნუ სტირითო, მთავარია ყაჩაღებმა არ მოგკლანო!

არასოდეს მომდომებია სხვა ქვეყანაში ცხოვრება და ბევრჯერ უარიც მითქვამს უცხოეთში სამუშაოდ და საცხოვრებლად გადასვლაზე. დღეს კი ვფიქრობ რა ბედნიერებაა, კატო მაინც რომ აშშ-ს მოქალაქეა, ზაზუკა კი ესპანეთში სწავლობს.

კომპანიის დავალიანებებს რომ გავისტუმრებთ და ეს სადისტური სასამართლო პროცესი რომ დამთავრდება, მოვკიდებ მაიას ხელს და ან მადრიდში და ან ატლანტაში წავიყვან!

რუსუდანს ხომ დღესვე მიიღებენ გაეროში სამუშაოდ. მაია კი ნებისმიერ ადგილასაა ბიზნესის ამწყობი- ჯერ კიდევ როდის სთავაზობდნენ მაღალანაზღაურებად ადგილს ამერიკულ სამშენებლო კომპანიაში (ჯორჯიაში).

ან სულაც წმ. მიწაზე გადავსახლდებით- იქ როგორც თავისიანს მიყურებენ მაინც. თან ცოდვებსაც მოვინანიებთ!

ცხადია, მანამდე თუ გავუძელით ამ საგიჟეთს: რეკეტერი ხელისუფლება, მკვლელი პოლიციელი, გამომძალველი კლიენტი, ვისაც უფულოდ უნდა ჩაიგდოს ხელში პატიოსანი გადამხდელის ფულით აშენებული ბინა, უმუშევრობა, გადარეული დიდი მეზობელი და კიდევ ვინ მოთვლის რამდენი უბედურება! გაგვაძლებინოს ყველას უფალმა!” - წერს ვახტანგ რჩეულიშვილი.