26 იანვარს, 16:00 საათზე, თბილისის საქალაქო სასამართლოში ბექა წიქარიშვილის საქმის განხილვა ჩაინიშნა. ამასთან დაკავშირებით "ფეისბუქში" რეგისტრირებულ ბექა წიქარიშვილის მხარდამჭერ გვერდზე "ბექა კრიმინალი არ არის" გამოქვეყნებულ ჩანაწერს გთავაზობთ:
26 იანვარს, 16:00 საათზე, თბილისის საქალაქო სასამართლოში ბექა წიქარიშვილის საქმის განხილვა ჩაინიშნა. როგორც ჩვენთვის ცნობილია, პროკურატურა საქმეზე საპროცესო შეთანხმების გაფორმებას არ გეგმავს. ამიტომაც, სავარაუდოდ, საქმის განხილვა იმ დღესვე დასრულდება. საპროცესო შეთანხმების გარეშე, გამამტყუნებელი განაჩენის გამოტანა კი ბექასთვის, მინიმუმ, 7 წლით თავისუფლების აღკვეთას ნიშნავს.
მიუხედავად ნარკოდანაშაულის მიმართ არსებული არაპროპორციული სასჯელებისა, რეპრესიული პოლიტიკის შესახებ გამართული საჯარო დისკუსიისა, საზოგადოებრივი პროტესტისა და ცალკეული თანამდებობების პირების მხრიდან პრობლემის აღიარებისა, სახელმწიფოს რეალურად არ შეუცვლია საკუთარი მიდგომა ამ საკითხის მიმართ.
დეკლარირებული რეპრესიული პოლიტიკის მიუხედავად, პრაქტიკის ანალიზი აჩვენებს, რომ სხვა მსგავს შემთხვევებში, პროკურატურა საპროცესო შეთანხმებებს აფორმებს. თუმცა, ბექას საქმეზე, რომელმაც სახელმწიფოს ძალადობრივი პოლიტიკა საჯარო დისკუსიის საგანი გახადა და მის ირგვლივ საზოგადოების პროტესტის მობილიზება მოახდინა, ხელისუფლება განსაკუთრებით მკაცრია, რაც ჩვენი აზრით მოქმედი ნარკოპოლიტიკის შენარჩუნებისა და არსებული პროტესტის უარყოფის დემონსტრირებაა.
27 წლის ბექა წიქარიშვილი 2013 წლის ივნისში ოპერატიული ინფორმაციის საფუძველზე დააკავეს:
“ვაგზლის მოედნის მიმდებარე ტერიტორიაზე დამაკავა პოლიციამ, როგორც თქვეს, ოპერატიული ინფორმაცია ჰქონდათ, აღმომიჩინეს მარიხუანა, ნაწილი შემდეგ ამოიღეს ჩემი სახლიდან. სამი დღე ვიყავი წინასწარი პატიმრობის საკანში.
შემდეგ სასამართლომ აღმკვეთი ღონისძიების სახით 10 000 ლარიანი გირაო შემიფარდა, სანამ გირაოს უზრუნველყოფას მოვახდენდით, 18 დღე მომიწია გლდანის ციხეში ყოფნა, მერე სახლი ჩავდეთ გირაოს უზრუნველსაყოფად და გამომიშვეს”, – ბექა წიქარიშვილი - "ნეტგაზეთს".
