მშობელთა საინიციატიცო ჯგუფი 21 მაისს, 12 საათზე, განათლებისა და მეცნიერების სამინისტროსთან მართავს საპროტესტო-გამაფრთხილებელ აქციას.
აქციის მიზანია ხმა მიაწვდინონ პარლამენტის წევრებს - 27 მაისს, სასკოლო ასაკთან დაკავშირებული საკანომდებლო ინიციატივის მეორედ განხილვის დროს, გამოიჩინონ გულისხმიერება, გაითვალისწინონ პრემიერის მიერ გაკეთებული განცხადება და იხელმძღვანელონ საკუთარი პრინციპით.
"მიღებული მითითების მიუხედავად, მინისტრი სანიკიძე ვერ ან არ ასაბუთებს თავის გადაწყვეტილებას და, ჯიუტად, საკითხს ამოწურულად მიიჩნევს. გახმოვანებული არგუმენტი წინასასკოლო მზაობის პროგრამების შესახებ მორიგი ტყუილი აღმოჩნდა.
ჩვენ გავმართეთ კონსულტაციები ამ საკითხით დაინტერესებულ ადამიანებთან და აღმოჩნდა, რომ დასახელებული არგუმენტი იდეის დონეზეა, არ არსებობს დასაბუთებული სახელმწიფო ნება - ხელი შეუწყოს აღნიშნული პროექტის განხორციელებას, რაც გულისხმობს, რომ ჩვენ დავზარალდებით და ფაქტის წინაშე აღმოვჩნდებით. ასეთ შემთხვევაში, პროტესტიც დაკარგავს აზრს.
მშობლებო, გთხოვთ შემოგვიერთდით. ჩვენი აქტიურობით დავარწმუნებთ პარლამენტარებს, რომ გადაწყვეტილება სასიცოცხლო მნიშვნელობისაა და მინისტრის გაუაზრებელ ახირებას არ უნდა დაეთანხმონ.
აქციაზე მოწვეულია კანონპროექტის ინიციატორი, ფსიქოლოგები, არასამთავრობო ორგანიზაციები, საზოგადოების ცნობილი სახეები.
დაზარალებული 20000-მდე ბავშვია… საბოლოოდ შეგვიძლია დავასკვნათ, რომ სამინისტროს ინტერესი ამ სიტუაციაში ერთადერთია - ბიუჯეტში დაზოგოს 8 მლნ. ლარი, ეს გადაწყვეტილება კი ძალიან ცუდად აისახება ჩვენი შვილების მომავალზე.
ხაზგასმით აღვნიშნავთ, აქცია და მისი მოთხოვნები ემიჯნება პოლიტიკურ განცხადებებს და წარმოადგენს დაზარალებული მშობლების პროტესტს მინისტრის გაუაზრებელი ახირების წინააღმდეგ.
მშობლებო, ხუთშაბათს, 21 მაისს, 12 საათზე შემოგვიერთდით განათლებისა და მეცნიერების სამინისტროსთან!
ჩვენს ერთად დგომას შეუძლია ჩვენი პრობლემის მოგვარება!", - ნათქვამია განცხადებაში, რომელსაც საინიციატივო ჯგუფი ავრცელებს.
