საქართველოს პარლამენტის სპორტისა და ახალგაზრდულ საქმეთა კომიტეტი განცხადებას ავრცელებს და ლევან ყიფიანის უწყებაში არსებულ სიტუაციას კიდევ ერთხელ აანალიზებს.
განცხადებაში აღნიშნულია საბიუჯეტო სახსრების ერთპიროვნულად განკარგვა-გადანაწილების, გაუმართლებელი ხარჯების, კადრების არაკვალიფიციურობისა და არასწორი პრიორიტეტების შესახებ.
კომიტეტის 11 წევრის მიდგომა არ შეცვლილა: ისინი მთავრობის მეთაურის მხრიდან ლევან ყიფიანის გადაყენების გადაწყვეტილებას ელოდებიან, წინააღმდეგ შემთხვევაში, მინისტრისადმი უნდობლობის საკითხის დაყენებას აპირებენ.
კომიტეტის განცხადებაში (სრულად შეგიძლიათ იხილოთ აქ), სხვა საკითხებთან ერთად, აღნიშნულია:
„სერიოზულ კითხვებს ბადებს სამინისტროში დასაქმებულთა კვალიფიკაცია და პროფესიონალიზმი. ასამდე თანამშრომელთა შორის 4-5 კაცს თუ აქვს სპორტული განათლება, საერთოდ - სპორტთან შემხებლობა.
ამ ვითარებაში კიდევ უფრო უცნაურია მინისტრის ერთპიროვნული გადაწყვეტილება გაუგებარი მოტივებით სწორედ გამოცდილი და კვალიფიციური თანამშრომლების დათხოვნის შესახებ (ნიშანდობლივია, რომ სამინისტროდან დათხოვნილთა შორის აღმოჩნდა ერთ-ერთი სამმართველოს უფროსი, რომელმაც ეჭვი შეიტანა ჭადრაკის ფედერაციისთვის ათეულობით მილიონობით ლარის გამოყოფის მიზანშეწონილებაში და ამის თაობაზე ღიად მოახსენა მინისტრს).
ამასობაში, მნიშვნელოვან და საპასუხისმგებლო პოსტებზე წინაურდებიან საეჭვო წარსულისა და რეპუტაციის კადრები“.