2015-04-22 17:58

არასამთავრობო ორგანიზაცია „საერთაშორისო გამჭვირვალობა - საქართველომ“ გამოიკვლია, რომ 2012 წლის არჩევნების შემდეგ ბიძინა ივანიშვილის კომპანიებიდან სახელმწიფო სტრუქტურებში 38 ადამიანია დასაქმებული, მათ შორის 6 პოლიტიკური თანამდებობის პირია.

პრემიერმინისტრ ირაკლი ღარიბაშვილის გარდა, რომელიც ფონდ „ქართუს“ თავმჯდომარე და ბანკი „ქართუს“ სამეთვალყურეო საბჭოს წევრი იყო, ასევე მინისტრის პოსტი უკავია ბანკი „ქართუს“ ყოფილ გენერალურ დირექტორს გიორგი კვირიკაშვილს, თანამდებობაზე გუშინ დაინიშნა ნოდარ ჯავახიშვილიც, რომელიც ასევე იყო ბანკი „ქართუს“ და „ქართუ ჯგუფის“ გენერალური დირექტორი.

მარნეულის მუნიციპალიტეტის გამგებლის მოვალეობის შემსრულებელი პაატა აბრამიშვილი კი შპს „ელიტა ბურჯის“ მძღოლი იყო, ხოლო საჩხერის უკვე ყოფილი გამგებელი ივანე გოშაძე - ასოციაცია „ატუში“ ოსტატის პოზიციას იკავებდა. ჯანდაცვის მინისტრის პოსტი უჭირავს საჩხერის სამედიცინო ცენტრის დირექტორს დავით სერგეენკოს და ასევე არაერთი მინისტრის მოადგილის თანამდებობას იკავებენ ბანკი "ქართუს" ყოფილი თანამშრომლები.

„ყოფილ პრემიერმინისტრთან დაკავშირებული კომპანიების თანამშრომელთა წამყვან პოლიტიკურ თანამდებობებზე გადანაცვლება საჯარო სამსახურში ეჭვქვეშ აყენებს საჯარო მოხელეთა შერჩევის მერიტოკრატიულ პრინციპს და კიდევ უფრო ამყარებს ვარაუდს ხელისუფლებაზე ივანიშვილის არაფორმალური გავლენის შესახებ“, - წერია „საერთაშორისო გამჭვირვალობა - საქართველოს“ მიერ გამოქვეყნებულ განცხადებაში.