2015-04-19 23:33

ბატალიონ „აზოვის“ მებრძოლებმა მთელი ღამის განმავლობაში რამდენიმე მცდელობის შემდეგ, დილის საათებში, ეუთოს მისიის მონაწილეობით მოახერხეს შიროკინოსთან დაღუპული ქართველი მეომრის გიორგი ჯანელიძის ცხედრის გადმოსვენება.

„აზოვის“ პრესცენტრი იტყობინება, რომ გიორგი ჯანელიძე თანამებრძოლებთან ერთად შიროკინოს ქუჩებში გადაადგილდებოდა და შენობების განნაღმვით იყო დაკავებული, როცა ტერორისტების ჯგუფმა მოულოდნელად გახსნა ცეცხლი.

„აზოვმა“ მათ საპასუხო ცეცხლით უპასუხა, რა დროსაც ტერორისტთა ჯგუფმა დაკარგა 5 ბოევიკი, ხოლო „აზოვმა“ უკან დაიხია. უკანდახევის დროს სასიკვდილოდ დაიჭრა გიორგი ჯანელიძე, ხოლო მასობრივი, ჯვარედინი ცეცხლის გამო თანამებრძოლებმა ბრძოლის ველიდან მისი ცხედრის წაღება ვერ შეძლეს.

მთელი ღამისა და დილის განმავლობაში „აზოვმა“ რამდენჯერმე სცადა ცხედრის გამოყვანა, მაგრამ ტერორისტებმა ამ მცდელობებს ცეცხლით უპასუხეს. ცოტა ხნის განმავლობაში ცეცხლი შეწყდა და „აზოვის“ მებრძოლებს ჯანელიძის ცხედართან მიახლოების საშუალება მიეცათ, თუმცა, შენიშნეს, რომ სავარაუდოდ, ცხედარი დანაღმული იყო, ხოლო შემოგარენში ტერორისტთა სნაიპერები მუშაობდნენ.

ამ მიზეზების გამო სპეცოპერაცია დილამდე გადაიდო. დილით „აზოვმა“ შეავიწროვა და განდევნა ტერორისტთა ჯგუფი, ხოლო გიორგი ჯანელიძის ცხედარი ნაღმისგან გააუვნებელჰყვეს და ადგილიდან გაიტანეს.

სავარაუდოდ, ცოტა ხანში გახდება ცნობილი, როდის გადაასვენებენ გიორგი ჯანელიძის ცხედარს კიევში, კიევიდან კი სამშობლოში.

41 წლის გიორგი ჯანელიძე უკრაინაში მოხალისედ იბრძოდა. ის იქ თურქეთიდან ჩავიდა, სადაც ბოლო დროს ცხოვრობდა. ჯანელიძე ახალბედა მებრძოლებს ინსტროქტორობდა და საჭირო უნარჩვევებს უნერგავდა. ის 2008 წლის რუსეთ-საქართველოს ომშიც მონაწილეობდა. გიორგი ჯანელიძეს მეუღლე და სამი მცირეწლოვანი შვილი დარჩა.