-
2017-09-14 15:51
მიხეილ სააკაშვილის განცხადებით, მის სასტუმრო ოთახში სათვალთვალო და მოსასამენი აპარატურა იქნა აღმოჩენილი.
განცხადება ამის შესახებ ოდესის ოლქის ყოფილმა გუბერნატორმა "ფეისბუქის" საკუთარ გვერდზე პირდაპირ ეთერში, ქალაქ ჩერნოვეციდან გააკეთა. სააკაშვილმა ის მოწყობილობაც წარმოადგინა, რომელიც ოთახში იქნა ნაპოვნი:
"იმ დროს როდესაც მტერმა აღმოსავლეთ საზღვარი გაარღვია, იმ დროს, როდესაც უკრაინაში ჯაშუშები დარბიან, მაშინ როცა მედვედჩუკი პოროშენკოს მთავარი ბიზნესპარტნიორი გახდა და ყოველდღიურად უკრაინელ მძღოლებზე და ავტოგაზზე ფულს აკეთებს, მაშინ, როცა მათ ყველაფერი ენგრევათ, დაკავებულია ჩემი პირადი ცხოვრების ჩაწერით სასტუმროს ნომრებში.
პეტრო ალექსეევიჩ! უქმეებზე სხვა საქმე არ გაქვთ? გინდათ ნახოთ სააკაშვილი ტუალეტში როგორ დადის? თქვენი ცხოვრება არ გყოფნით? გინდათ დაკავდეთ ჩემი პირადი ცხოვრებით? სექსუალური ისტორიებით? ნანახი მაქვს ასეთი ადამიანები. პუტინი აკეთებდა ამას.
გვყავდა ჩვენ ასლან აბაშიძე საქართველოში, ისიც ამას აკეთებდა. არ გრცხვენიათ? მე ქვეყნის პრეზიდენტი ვიყავი და ვუკრძალავდი ჩემს სპეცსამსახურებს ჩაეწერათ პირადი ცხოვრება, აგენტებისაც კი.
იყო ასეთი შემთხვევა, პეტრო ალექსეევიჩ, ვიცი, რომ ჩემს ეთერებს უყურებთ, როცა მე ერთ-ერთი აგენტის ჩანაწერი მომიტანეს, სადაც პირადი ხასიათის ინფორმაცია იყო და ჩვენ სამსახურებს უნდოდათ ამის გამოყნება.
მე მათ ვუთხარი, რომ ეს ჩანაწრი გაენადგურებინათ და არასდროს აღარ ჩაწერდნენ მტერებსაც კი ნომრებში, ოთახებში, საძინებლებში, ტუალეტში. თქვენ კი, ეს რა არის?" - აცხადებს სააკაშვილი.