"ეს ისტორიული გამარჯვებაა, გილოცავთ თქვენც და ნასაკირალშიც, ძალიან მაგარ კანდიდატს. როგორც წალენჯიხიდან დაიწყო თავის დროზე საქართველოს შემობრუნება, ისეა ახლა ერთი გურული და ერთი მეგრული სოფლიდან",
- ასე მიმართა საქართველოს მესამე პრეზიდენტმა კორცხელში შუალედურ არჩევნებში გამარჯვებულ ენმ-ს წარმომადგენელს ვარადებულ ლაშხიას. სააკაშვილმა გამარჯვება მიულოცა ასევე ნასაკირალის უბანში ენმ-ს კანდიდატს ბესიკ ქათამაძეს.
ცესკოში შესული ოქმის მიხედვით, წინასწარი შედეგებით ცნობილი ხდება, რომ კორცხელის 53-ე და 54-ე უბანზე, ასევე სოფელ ნასაკირალის უბანზე შუალედური არჩევნები “ნაციონალურმა მოძრაობამ” მოიგო.
შეგახსენებთ, რომ ”ნაციონალური მოძრაობისა” და ”ქართული ოცნების” წარმომადგენლებს შორის კორცხელის #53-ე უბანზე ფიზიკური დაპირისპირება მოხდა. ჩხუბში სპორტსმენებიც იყვნენ ჩართული. სამართალდამცველები შემთხვევის ადგილზე მოგვიანებით მივიდნენ. ჩხუბის დროს დაშავდა ”ნაციონალური მოძრაობის” რამდენიმე წევრი, მათ შორის ნიკა მელია, გიგა ბოკერია, აკო მინაშვილი, ნუგზარ წიკლაური, თენგიზ გუნავა და სხვები.
