2016-05-21 22:40

საქართველოს სახელმწიფო მინისტრი შერიგებისა და სამოქალაქო თანასწორობის საკითხებში პაატა ზაქარეიშვილი ხურჩაში გიგა ოთხოზორიას მკველობასთან დაკავშირებულ პირველ კომენტარში ამბობს, რომ ეს არის საშინელი მკვლელობა და სისხლის სამართლის დანაშაული, მაგრამ ქვეყანაში მდგომარეობა მძიმე არ არის. 

კომენტარი ზაქარეიშვილმა "რუსთავი-2"-თან და "მაესტროსთან" გააკეთა და აღნიშნა, რომ მომხდარზე რეაგირება არა რუსეთისგან, არამედ საერთაშორისო ორგანიზაციებისგან უნდა მოითხოვონ: "რუსეთისგან რა უნდა მოვითხოვოთ, რუსეთი რას დასჯის, არიან საერთაშორისო ორგანიზაციები, რომლებისგანაც უნდა მოვითხოვოთ ამ საქმეზე რეაგირება", - აღნიშნა ზაქარეიშვილმა და დაამატა, რომ ეს არის პირველი შემთხვევა, პირველი ამგვარი მკვლელობა მოქმედი ხელისუფლების პირობებში, რაც ეჭვქვეშ აყენებს სამშვიდობო პოლიტიკას, თუმცა, მისივე თქმით, "ჩვენ სამშვიდობო პოლიტიკას არ გადავუხვევთ".

"ეს არის გამონაკლისი მკვლელობა, მას არა აქვს სისტემური ხასიათი, როგორც ნაციონალების მმართველობის დროს ხდებოდა, არაა განგრძობითი, არ მეორდება და ჩვენ ყველაფერს გავაკეთებთ, რომ ეს იყოს ერთადერთი", - განაცხადა პაატა ზაქარეიშვილმა.