2015-03-02 09:39

ქართული ოცნების ორი ლიდერის, დავით საგანელიძისა და ზაქარია ქუცნაშვილის დაპირისპირება „ქართული ოცნების“ ფარგლებს გასცდა და როგორც პარტიაში ამბობენ ისინი ერთმანეთს აღარ ელაპარაკებიან.

ქუცნაშვილიც და საგანელიძეც აღიარებენ, რომ პოლიტიკური დუელის რეჟიმში იმყოფებიან, მაგრამ დაპირისპირების პროვოცირებაში ერთმანეთს ადანაშაულებენ.

კონფლიქტი „ქართულ ოცნებაში“ მას შემდეგ გამწვავდა, რაც დეპუტატების ერთმა ნაწილმა ღიად განაცხადა, რომ  უკვე მიღებული გადაწყვეტილებების შესახებ პოსტ-ფაქტუმ იგებენ.

ქუცნაშვილი ამბობს, რომ ამ პრობლემის მოგვარების რესურსი „ქართულ ოცნებას“ ჯერ კიდევ აქვს და ამიტომ პარტიის რიგების დატოვებას არ აპირებს.

საგანელიძე უკვე მერამდენედ დაიმუქრა, რომ პარლამენტს დატოვებს, თუმცა როგორც ჩანს დეპუტატობა არ ეთმობა და კონკრეტულ თარიღს არ ასახელებს.

ამბობს იმასაც, რომ უახლოეს მომავალში მის წინააღმდეგ გამოქვეყნებულ კომპრომატებზე საზოგადოებას გამოძიების შედეგებს გააცნობს და პარლამენტიდანაც ამის შემდეგ წავა. საუბარია დოკუმენტებზე, რომლის თანახმადაც საგანელიძე სპეცსამსახურების აგენტი იყო.

 http://rustavi2.com/