2020-04-28 12:22

„ევროპული საქართველო“ მოითხოვს, გაიზარდოს ტესტირებათა რაოდენობა, რათა შესაძლებელი გახდეს რეალური ეპიდემიოლოგიური სურათის დანახვა, - ამის შესახებ პარტიის ერთ-ერთმა წევრმა ზურაბ ჭიაბერაშვილმა  დღეს გამართულ ბრიფინგზე განაცხადა.

როგორც ჭიაბერაშვილი აღნიშნავს, ქვეყანაში არსებობს რესურსი, რომ მეტი ტესტი ჩატარდეს.

ამასთან, მისივე თქმით, ჯანდაცვის სამინისტრომ ყოველდღიურად უნდა გამოაქვეყნოს დეტალური ინფორმაცია, თუ რომელ რაიონში რამდენი ტესტი ჩატარდა, ასევე, მონაცემები შესაბამის რისკ-ჯგუფების და მედპერსონალის ტესტირების შესახებ.

„ქვეყანა კრიზისშია, ათასობით და ათიათასობით მოქალაქე შემოსავლის გარეშეა დარჩენილი და უწევს სახლში ყოფნა ამ კრიზისის პირობებში და ასეთ დროს, ივანიშვილს ხელისუფლება ქვეყნისათვის დამაზიანებელ გზას ადგას. საზოგადოებაში ძალიან ბევრი ლეგიტიმური კითხვა ჩნდება იმასთან დაკავშირებით, რამდენად გამართლებულია მთავრობის მიერ არჩეული კურსი როგორც ეკონომიკური, ისე ჯანდაცვის მიმართულებით. ამ დროს ამ ლეგიტიმურ კითხვებს ქვეყნის მტრობას უწოდებს სახელისულებო გუნდი, იქნება ეს კახა კალაძე თუ ირაკლი კობახიძე.

„ევროპული საქართველო“ ქვეყანაში ეპიდემიის გავრცელებიდან მოყოლებული, ითხოვს ტესტირების პროცესის დაჩქარებას, რაც საზოგადოებას რეალურ სურათს დაანახებდა, ხოლო უაზროდ მკაცრი და ხშირად აბსურდული რეგულაციების ნაცვლად, მხოლოდ აუცილებელი შეზღუდვები გახდებოდა საჭირო”, - განაცხადა ჭიაბერაშვილმა.

მისივე განცხადებით, ხელისუფლება შერჩევითად იყენებს საგანგებო მდგომარეობას.

„დიდ აღშფოთებას საზოგადოებაში ისიც, რომ „ქართული ოცნება“ შერჩევითად იყენებს საგანგებო მდგომარეობას. ხელისუფლებასთან დაახლოებული ჯგუფები არაფრად აგდებენ გადაადგილებასთან თუ ეკონომიკურ საქმიანობასთან დაკავშირებულ შეზღუდვებს.

საქართველოსთვის ამ ურთულეს პერიოდში, ჩვენი ქვეყნის მოქალაქეების ჯანმრთელობისა და კეთილდღეობის დასაცავად, კატეგორიულად მოვუწოდებთ ხელისუფლებას, თვითკმაყოფილების ნაცვლად, ამჯერად მაინც იზრუნოს ქვეყნის ინტერესებზე და დაუყოვნებლივ გადადგას შემდეგი ნაბიჯები: გაზარდოს ტესტირებათა რაოდენობა, რათა შესაძლებელი გახდეს რეალური ეპიდემიოლოგიური სურათის დანახვა; მოხსნას აბსურდული შეზღუდვები და აღკვეთოს კანონის შერჩევითი გამოყენება; მნიშვნელოვნად შეამციროს საგადასახადო ტვირთი და მეტი ფული დაუტოვოს ხალხს; დაუბრუნოს მოქალაქეებს და ბიზნესს საპენსიო ფონდში დაგროვილი მათი კუთვნილი თანხა; სამართლიანად და გამჭვირვალედ მიმართოს საბიუჯეტო სახსრები მოქალაქეთა დასახმარებლად”, - განაცხადა ჭიაბერაშვილმა.