2014-03-07 22:48

„ომი არის ჩვენი სუვერენული უფლება, ხვალაც რომ მოგვიწიოს ომის დაწყება იმ ტერიტორიაზე, რომელიც აქვს ოკუპირებული რუსეთს, ეს ჩვენი უფლებაა,“ -აცხადებს თავდაცვის ყოფილი მინისტრი ირაკლი ოქრუაშვილი.

ოქრუაშვილის თქმით, ის თავს ვერ დადებს, მაგრამ სავარაუდოდ მისი ხელისუფლებასი ყოფნის შემთხვევაში ომი სხვაგვარად დასრულდებოდა.

ამავე დროს, მისთვის გაუგებარია, რატომ აინტერესებს საზოგადოებას, ვინ დაიწყო ომი, რადგან მთავარი ის კი არაა, ვინ დაიწყო, არამედ ის, თუ რატომ დასრულდა ის „ასე სამარცხვინოდ“:

„ჩემთვის მთავარი კითხვაა, რატომ დასრულდა ამ შედეგით რუსეთ- საქართველოს 2008 წლის ომი?“- ამბობს ოქრუაშვილი.

მისივე თქმით, შეიძლებოდა ომი სხვა შედეგით დასრულებულიყო, რომ ყოფილიყო ელემენტარული გმირობის მაგალითი ჯარისთვის.

„მთავარსარდალი იმისთვის ხარ, რომ შენ უნდა იყო მაგალითის მიმცემი და სად ჯანდაბაში გარბიხარ შე მამაცხონებულო?“- თქვა მან მიხეილ სააკაშვილის მისამართით, რომელიც, როგორც ყოფილი თავდაცვის მინისტრი აცხადებს, გაქცევას აპირებდა.