2014-03-06 23:31

„აფხაზეთის ხმის“ ექსკლუზიური ინფორმაციით, ღუდუშაურის სახელობის კლინიკაში დაახლოებით ერთი საათის წინ მიიყვანეს პატიმარი, რომელსაც ვენები ჰქონდა გადაჭრილი.

როგორც „აფხაზეთის ხმას“ ღუდუშაურის კლინიკიდან წყარომ აცნობა, პატიმარი ნიღბიანმა შეიარაღებულმა პირებმა, სავარაუდოდ, სასჯელაღსრულების დეპარტამენტის თანამშრომლებმა მიიყვანეს.

წყაროს თქმით, პატიმარს კლინიკასთან ოჯახის წევრები და ნათესავები დახვდნენ. წინასწარი ინფორმაციით, პატიმარმა დედას ტელეფონით თავად შეატყობინა, რომ ვენები გადაიჭრა.

წყარო ზუსტად ვერ ასახელებს, სასჯელარსრულების რომელი დაწესებულებიდან გადაიყვანეს პატიმარი კლინიკაში ან რა გახდა თვითდაზიანების მიზეზი.

სასჯელაღსრულების დეპარტამენტის პრესსამსახურში ადასტურებენ, რომ დღეს ღუდუშაურის კლინიკაში პატიმარი მიიყვანეს და დამატებით ინფორმაციასაც იძლევიან, თუმცა, არ ადასტურებენ „აფხაზეთის ხმის“ წყაროს ინფორმაციას იმის თაობაზე, რომ კლინიკაში მიყვანილ პატიმარს თვითდაზიანება აღენიშნებოდა:

„ვადასტურებთ, რომ ამ დროისთვის ღუდუშაურის კლინიკაში ორი პატიმარი გადის მკურნალობას, მაგრამ რაც თქვენ გვითხარით, ანუ, ის, რომ მიყვანილ პატიმარს თვითდაზიანება აქვს, არ შეესაბამება რეალობას. ჩვეულებრივ, მკურნალობას გადიან იმ კუთხით, რა კუთხითაც სჭირდებათ“, – უთხრეს „აფხაზეთის ხმას“ სამინისტროს პრესსამსახურში.