-
2015-06-26 07:47
აშშ-ის სახელმწიფო დეპარტამენტის ანგარიში მსოფლიოში ადამიანის უფლებების დაცვის კუთხით არსებულ სიტუაციაზე მედიას ჯონ კერიმ წარუდგინა. ანგარიშში საქართველოში გახმაურებული საქმეებიც მოხვდა.
საკნიდან ვანო მერაბიშვილის გაყვანის, მიხეილ სააკაშვილისა და ბაჩანა ახალაიასთვის წაყენებული ბრალდებები, ალასანიას მოხსნისა და ე.წ. კაბელების საქმე, ფარული მოსმენები „რუსთავი-2“-ის ოფისში - ეს ის თემებია, რომლებიც სახელმწიფო დეპარტამენტის ანგარიშში მოხვდა.
ანგარიშში ნათქვამია, რომ 2012 წლის დეკემბრის შემდეგ ხელისუფლებამ ბრალი წაუყენა ყოფილი ხელისუფლების 45 მაღალი თანამდებობისა და საშუალო რანგის პირებს, მათ შორის ყოფილ პრეზიდენტს, ოპოზიციური პარტიის გენერალურ მდივანსა და ყოფილ თავდაცვის მინისტრს.
ანგარიშში ხელისუფლებისა და არასამთავრობო ორგანიზაციების მთავარ შეუთანხმებლობად უკანონო მოსმენების თემა დასახელდა. ჯონ კერიმ ამაზე საუბრისას მაგალითად მოიყვანა "რუსთავი-2"-ის ოფისში გაკეთებული უკანონო ფარული ჩანაწერი.
ანგარიშში ასევე შესულია ქობულეთში, მეჩეთის შესასვლელთან დაკლული ღორის თავის დამაგრების ფაქტი და რამდენიმე თანამდებობის პირის ჰომოფობიური გამონათქვამები. ანგარიშის მიხედვით ქალებზე ძალადობა საქართველოში ისევ პრობლემად რჩება.
სახდეპის ანგარიშში დადებით ფაქტორებზეც არის გამახვილებული ყურადღება. კერძოდ, მითითებულია, რომ შემცირებულია პატიმართა სიკვდილიანობა და რომ სასამართლოს პრაქტიკაში გახშირდა აღმკვეთი ღონისძიების სახით გირაოს გამოყენება, რის გამოც არ ხდება ყოველთვის პატიმრობის შეფარდება.