აღმოსავლეთ-დასავლეთის ჩქაროსნული მაგისტრალის რიკოთი-არგვეთას მონაკვეთი, შესაძლოა, ფასიანი გახდეს. ეს მხოლოდ იმ შემთხვევაში მოხდება, თუ იქნება ალტერნატიული გზები. - ამის შესახებ ფინანსთა მინისტრმა ნოდარ ხადურმა განაცხადა.
მისი თქმით, ალტერნატიული გზების არარსებობის შემთხვევაში არც ფასიანი გზის არსებობა განიხილება, მაგრამ თუ ალტერნატიული გზა იქნება, იქნება ფასიანი მონაკვეთიც, "როგორც ეს მსოფლიოშია მიღებული".
"თქვენ იცით, რომ როგორც აღმოსავლეთ საქართველოში, ისე დასავლეთ საქართველოში აქტიურად მიმდინარეობს გზების მშენებლობა და ამ ყველაზე რთულ მონაკვეთზე არის სერიოზული პრობლემები. ამიტომ განიხილება რამდენიმე ვარიანტი. უპირველეს ყოვლისა, უნდა აღინიშნოს, რომ ეს გზა მნიშვნელოვნად შეამოკლებს როგორც მანძილს ხაშურსა და ზესტაფონს შორის, ასევე დროს.
ამავე დროს, განიხილება სხვადასხვა ვარიანტი. მათ შორის, ვარიანტი იმის შესახებ, რომ გზა შეიძლება იყოს ფასიანი მხოლოდ იმ შემთხვევაში, თუ იქნება ალტერნატიული გზები. სხვა შემთხვევაში ეს ვარიანტი არ განიხილება. საუბარია მხოლოდ იმაზე, რომ როგორც მიღებულია მსოფლიოში, ფასიანი შეიძლება იყოს გზის მონაკვეთი, თუ მას გააჩნია შესაბამისი ალტერნატივები", - მოჰყავს "ინტერპრესნიუსს" ნოდარ ხადურის ციტატა.