2015-06-07 19:59

უკრაინელი მილიარდერის იგორ კოლომიისკის მიერ კონტროლირებად ტვ "1+1" მიერ მიხეილ სააკაშვილის შესახებ შავი პიარის ელემენტებით მომზადებულ ფილმს უკრაინულ მედიაში არაერთგვაროვანი გამოხმაურებები მოჰყვა. ექსპერტები, სოცქსელების აქტიური მომხმარებლები და პოლიტიკოსთა უმრავლესობა მიიჩნევს, რომ კოლომიისკიმ თავი გაიყიდა, როცა სააკაშვილს ამ გზით დაუპირისპირდა. 

"1+1"-ის პროგრამაში "უკრაინული სენსაციები" ფილმი მიხეილ სააკაშვილზე სახელწოდებით "ქართველი გასტროლიორი" ასეთი ტექსტით იწყება: "სამშობლოსა და მსოფლიოში მიხეილ სააკაშვილს დიქტატორს უწოდებენ. მისი მმართველობის დროს ციხეში იჯდა ყოველი მეათე ქართველი, მათ შორის თითქმის ყველა პოლიტიკური ოპონენტი, ვინც ქვეყნიდან გაქცევა ვერ მოასწრო..."

ფილმის შინაარსი და მისი ანონსი სააკაშვილის მიმართ იმ ცნობილ ბრალდებებზეა აგებული, რითაც საქართველოში ოპოზიცია და ცალკეული მედია მოქალაქეებს "ანებივრებდა", მათ შორისაა ბრალდებები სააკაშვილის მიერ "ღამის ორგიების" მოწყობის, ნარკომანობის და სხვათა შესახებ, ამასთან, მოშველიებულია "ალიას", "ასავალ-დასავალის" და სხვა გამოცემების ფოტოები და სტატიები, ასევე დაწვრილებითაა ჩამოთვლილი საქართველოს მთავარი პროკურატურის ბრალდებები საქართველოს მესამე პრეზიდენტის მიმართ.