2015-04-11 14:45

პოლიციელების მკვლელობაში ბრალდებულმა შალვა აბულაძემ სასამართლო პროცესზე მოსამართლეს პატიმრობაში დატოვება სთხოვა და ამის მიზეზად ის დაასახელა, რომ გარეთ მის სიცოცხლეს საფრთხე ემუქრება. აბულაძის თქმით, მისი ლიკვიდაცია TBC ბანკის დამფუძნებელს მამუკა ხაზარაძეს სურს.

აბულაძის განცხადებით, ხაზარაძის დაკვეთით ბორჯომში, მის სასტუმროში ხელყუმბარები ააფეთქეს და ასევე მისი კუთვნილი რესტორანი დაწვეს. აბულაძის თქმით, სწორედ ხაზარაძის დაკვეთით მისი მეგობრის 2 თვის ფეხმძიმე, 19 წლის საცოლე აწამეს.

პროკურორის განცხადებით მისთვის ეს ინფორმაცია სიახლეა, ხოლო მოსამართლემ მოუწოდა სამართალმდაცველებს ამ ფაქტებით დაინტერესდნენ.

მოსამართლე ბადრი შონიამ გადაწყვეტილება ძალაში დატოვა და აბულაძეს აღკვეთის ღონისძიების სახით პატიმრობა შეუფარდა.

აბულაძე გუშინ გამთენიისას, სოფელ არდაგანში ჩატარებული სპეცოპერაციისას დააკავეს. შალვა აბულაძეს სამართალდამცველები იანვრიდან ეძებენ. ბრალდებულმა ერთი პოლიციელი იანვარში მოკლა, მეორე კი, 4 აპრილს.

პოლიციელის, ბექა მარგიშვილის მკვლელობის საქმე ბორჯომში მოკლული პოლიციელის საქმესთან გაერთიანდა და პროკურატურამ ერთ წარმოებად წარადგინა. სავარაუდოდ, აბულაძეს 20 წლამდე თავისუფლების აღკვეთა ან უვადო პატიმრობა ემუქრება.

წყარო:ტაბულა