„ევროპული საქართველოს“ ერთ-ერთი ლიდერის სერგი კაპანაძის განცხადებით, პარტიამ მხარი არ დაუჭირა ქვეყანაში საგანგებო მდგომარეობის გაგრძელებას, რადგან მთავრობამ არ წარმოადგინა გეგმა, როგორ აპირებს შექმნილი ვითარების გამო დაზარალებული ადამიანების დახმარებას.

კაპანაძის თქმით, საგანგებო მდგომარეობის ფარგლებში ხელისუფლების მიერ დაწესებული შეზღუდვები არ ემსახურება საქართველოში ეპიდემიოლოგიური მდგომარეობის გამოსწორებას.

„ევროპულმა საქართველომ“ მხარი არ დაუჭირა საგანგებო მდგომარეობის გაგრძელებას, რადგან მთავრობამ არ წარმოადგინა გეგმა, როგორ აპირებს იმ ადამიანების დახმარებას, რომლებიც ძალიან დაზარალდნენ ამ ეკონომიკური კრიზისის შედეგად; მთავრობამ არ წარმოადგინა გეგმა, როგორ აპირებს ეკონომიკის თავიდან ამოძრავებას; მან არ წარმოადგინა გეგმა, თუ რასთან მიმართებაში იქნება ეს შეზღუდვები; არ წარმოადგინა ინდიკატორები. რაც მთავარია, მთავრობის წარმომადგენელიც კი არ მოვიდა პარლამენტში, არც პრემიერ-მინისტრი, არც ჯანდაცვის მინისტრი და არც ერთ კითვას არ გასცეს პასუხი, რომელიც საზოგდოებას გააჩნია. მათ უბრალოდ მოითოვეს ვადის გაგრძელება და ამასთანავე, ძალაში ტოვებენ ყველა იმ შეზღუდვას, რომელიც ჩვენი ღრმა რწმენით არის უაზრო და არ ემსახურება საქართველოში ეპიდემიოლოგიური მდგომარეობის გამოსწორებას. ასეთი შეზღუდვები ყველამ კარგად იცის რა არის, ამაზე დიდი ხანია ვსაუბრობთ. მათ ისიც კი არ უნდათ, რომ პასუხი გასცენ საზოგადოებას ამ თემებთან დაკავშირებით და ამიტომ, ჩვენ ვერ ავიღებდით პასუხისმგებლობას საგანგებო მდგომარეობის გაგრძელებაზე“, - განაცხადა კაპანაძემ.

რუსეთში ბოლო დღე-ღამის მანძილზე კორონავირუსის 4774 ახალი შემთხვევა გამოვლინდა და მთლიანობაში ინფიცირებულთა საერთო რაოდენობამ 62 773-ს მიაღწია. ამასთან ქვეყანაში ბოლო 24 საათის მანძილზე 42 ადამიანი დაიღუპა და გარდაცვლილთა რაოდენობამ საერთო ჯამში 2924 შეადგინა.

რუსეთის კორონავირუსთან ბრძოლის ოპერატიულ შტაბში აცხადებენ, რომ 4891 ადამიანი უკვე გამოჯანმრთელდა.

„ევროპული საქართველოს“ წევრის ირაკლი აბესაძის განცხადებით, ვირუსის გავრცელების საფრთხეს ზრდის არა კარანტინში მყოფი პირების მხრიდან დაწესებული შეზღუდვების დარღვევა, არამედ - ხელისუფლების მოქმედება საგანგებო მდგომარეობის ფარგლებში მიღებული კანონის აღსრულებისას. მისივე თქმით, ვირუსის გავრცელების რისკებს ზრდის ასევე მსუბუქი ავტომობილებით გადაადგილების აკრძალვა.

პირველი საუნივერსიტეტო კლინიკის ხელმძღვანელის, ლევან რატიანის განცხადებით ვირუსის შემომტანი უმეტესწილად ახალგაზრდები არიან. ლევან რატიანი ამბობს, რომ ახლა რეანიმაციაში კვდება პაციენტი, რომელსაც კორონავირუსი ოჯახის წევრის დაუდევრობის გამო გადაედო.

საგარეო საქმეთა სამინისტროს ინფორმაციით, 23 აპრილის მონაცემებით, საქართველოს დიპლომატიურმა წარმომადგენლობებმა ადგილზე დახმარება აღმოუჩინეს 12 636 მოქალაქეს, ხოლო სამშობლოში - მთავრობის ხელშეწყობით - საკოორდინაციო საბჭოს მიერ დაგეგმილი რეისების, სახმელეთო და საზღვაო გზებით, ორგანიზებულად დაბრუნდა 7 600 მოქალაქე. როგორც "ინტერპრესნიუსს" უწყებიდან აცნობეს, საზღვარგარეთ საქართველოს დიპლომატიური მისიები, საქართველოს საკოორდინაციო საბჭოს მითითებით და საგარეო საქმეთა სამინისტროს ცენტრალურ აპარატთან კოორდინაციით, განაგრძობენ დადგენილი კრიტერიუმებით საზღვარგარეთ მყოფი საქართველოს მოქალაქეების დახმარებას.

გასული დღე-ღამის მანძილზე, საქართველოს მასშტაბით, საგანგებო მდგომარეობის რეჟიმის დარღვევის 106 ახალი ფაქტი გამოვლინდა. ამის შესახებ „ინტერპრესნიუსს“ შინაგან საქმეთა სამინისტროდან აცნობეს. მათი ინფორმაციით, პოლიციამ ე.წ. კომენდანტის საათის დარღვევის ფაქტზე, მთელი ქვეყნის მასშტაბით 54 მოქალაქე დააჯარიმა.

ეკონომიკისა და მდგრადი განვითარების სამინისტროს ტექნიკური და სამშენებლო ზედამხედველობის სააგენტომ, ჯანდაცვის სამინისტროს შრომის პირობების ინსპექტირების დეპარტამენტთან ერთად, დამატებით იმ კომპანიების შემოწმებაც დაიწყო, რომლებიც დაკავებული არიან ან გადაეწყვნენ ონლაინ ვაჭრობაზე.

საქართველოს რეგიონული განვითარებისა და ინფრასტრუქტურის სამინისტროს, საავტომობილო გზების დეპარტამენტის ინფორმაციით, საერთაშორისო მნიშვნელობის მცხეთა–სტეფანწმინდა–ლარსის(რუსეთის ფედერაციის საზღვარი) საავტომობილო გზის გუდაური(ფოსტა)–კობის მონაკვეთზე ინტენსიური თოვის გამო ზვავსაშიშროებაა, რის გამოც ყველა სახის ავტოტრანსპორტის მოძრაობა აკრძალულია. აღნიშნულ ინფორმაციას საავტომობილო გზების დეპარტამენტი გარემოს ეროვნულ სააგენტოზე დაყრდნობით ავრცელებს.

ინფექციური საავადმყოფოს სამედიცინო დირექტორის, მარინა ეზუგბაიას განცხადებით, ინფექციურში კრიტიკული პაციენტები უკვე აღარ ჰყავთ და მათი მდგომარეობა დასტაბილურდა. როგორც ეზუგბაიამ ჟურნალისტებს განუცხადა, დღე-ღამის განმავლობაში საქართველოში 9 ახალი შემთხვევა დადასტურდა, მათგან 8 შემთხვევის წყარო ცნობილია, ერთის კვლევა კი ახლა მიმდინარეობს.

საქართველოს პროკურატურამ ქვეყანაში კორონავირუსის გავრცელების პრევენციისა და სოციალური დისტანციის დაცვის მიზნით, პენიტენციურ დაწესებულებაში მყოფი იმ ბრალდებულებისთვის, რომელთაც სატელეფონო კომუნიკაცია ბრალდების მხარის მიერ აქვთ შეზღუდული, სატელეფონო ზარების განხორციელების შესაძლებლობა 22 მაისამდე გაუგრძელა. ამის შესახებ ინფორმაციას გენერალური პროკურატურა ავრცელებს.