-
2014-09-04 18:05
თბილისის მერიის თანამშრომლების განცხადებით, მათ სამსახურიდან წასვლის შესახებ განცხადების დაწერას აიძულებენ. საუბარია დაახლოებით 20–მდე თანამშრომელზე. მათი განცხადებით, მთავარი მიზეზი არა კვალიფიკაცია, არამედ ის გარემოებაა, რომ ახალი გუნდის წევრები არ არიან.
მათივე მტკიცებით, აღნიშნული მოთხოვნა ხშირად უხეში ფორმითაც ხორციელდება, კერძოდ, ემუქრებიან, რომ ან განცხადებას დაწერენ, ან შენობიდან "ბორკილებ დადებულს გაიყვანენ".
აღნიშნულ თემაზე დღეს პრესკონფერენციაზე ისაუბრა სოციალური მომსახურეობის საქალაქო სამსახურის უფროსის ყოფილმა მოადგილე გიორგი ხაბეიშვილმა, რომელიც მისი თქმით, ვიცე–პრემიერ კახი კალაძის ცოლის ძმით ჩაანაცვლეს.
"ყოველგვარი ახსნა–განმარტების გარეშე თბილისის მერის ბრძანებით ვარ გათავისუფლებული თანამდებობიდან. თურმე არაჯეროვნად ვასრულებდი ჩემს უფლებამოვალეობას და მთელს თბილისში ერთადერთი ადამიანი, რომელმაც თურმე შეიძლება რომ ჯეროვნას შეასრულოს უფლებამოვალეობა, არის კახი კალაძის ცოლის ძმა, 23 წლის გიორგი არეშიძე, რომელსაც საჯარო სამსახურში მუშაობის არანაირი გამოცდილება არ აქვს. მისი СV იწყება სახელით და გვარით და მთავრდება პირადი ნომრით",– განაცხადა ხაბეიშვილმა.
თბილისის მერიის ადმინისტრაციის უფროსის რევაზ ჩახავას განცხადებით, სამსახურიდან თავისუფლდებიან არაპროფესიონალები.
"თბილისის მერიაში ვეღარ იმუშავებენ არაპროფესიონალები, რომლებიც ხელმძღვანელების მიერ მიცემულ ელემენტარულ დავალებასაც ვერ ასრულებენ. რაც შეეხება 1000–ობით თანამშრომელს, რომლებიც კვალიფიციურად ასრულებენ დაკისრებულ მოვალეობას, რა თქმა უნდა გააგრძელებენ მუშაობას. ამავდროულად, კანონის თანახმად ჩატარდება ატესტაცია და დაკომპლექტდება მერიის სამსახურები. ახალი თანამშრომლების შერჩევა ხდება პროფესიონალიზმისა და კვალიფიკაციის მიხედვით",– განაცხადა მერიის ადმინისტრაციის ხელმძღვანელმა.
"აქცენტი"