2014-08-29 01:51

რუსეთის პრეზიდენტმა ვლადიმირ პუტინმა ე.წ. ნოვოროსიის მებრძოლებს მიმართა და მათ ალყაში მოქცეული უკრაინელი სამხედროებისთვის ჰუმანიტარული დერეფნის შექმნისკენ მოუწოდა.

საგანგებო მიმართვაში პუტინმა განაცხადა, რომ უკრაინელ სამხედროებს, რომლებიც არა თავიანთი ნებით, არამედ გაცემული ბრძანების გამო მონაწილეობენ შეიარაღებულ დაპირისპირებაში, უნდა მიეცეთ საშუალება თავიანთ ცოლებს, შვილებსა და დედებს დაუბრუნდნენ.

თავის მხრივ, რუსეთის პრეზიდენტმა პირობა დადო, რომ რუსეთი მომავალშიც გააგრძელებს ჰუმანიტარული დახმარების გაწევას დონბასის მოსახლეობისთვის, რომელიც ჰუმანიტარული კატასტროფის წინაშე დგას. 

ვლადიმირ პუტინმა კიდევ ერთხელ მოუწოდა უკრაინის ხელისუფლებას, შეწყვიტოს საომარი მოქმედებები და მიუჯდეს მოლაპარაკების მაგიდას დონბასის წარმომადგენლებთან.