2014-08-27 15:13

ტრაგიკული შემთხვევა მოხდა არიზონაში, სადაც 39 წლის ინსტრუქტორი, რომელიც 9 წლის გოგონას ავტომატიდან სროლის წესებს უხსნიდა, შემთხვევითი ტყვიის მსხვერპლი გახდა - მას ტყვიები თავში მოხვდა და ექიმებმა ვერ გადაარჩინეს.

ინსტრუქტორი გოგონას ისრაელის წარმოების Uzi პისტოლეტ-ტყვიამფრქვევიდან მიზანში სროლის წესებს უხსნიდა. მან გოგონას ჯერ ერთჯერადი გასროლის წესი აუხსნა, ხოლო შემდეგ იარაღი ავტომატური სროლის რეჟიმზე გადაიყვანა ისე, რომ იარაღი გოგონას ეჭირა ხელში.

ინსტრუქტორი გონონასგან მარცხნივ იდგა. გოგონამ ჩახმახს გამოჰკრა ხელი, რასაც ავტომატური გასროლა მოჰყვა. ბავშვმა უკუცემის ძალის გამო იარაღის სწორი მიმართულებით დაკავება ვეღარ შესძლო და ძალაუნებურად, ლულა მხარმარცხნივ გაექცა, რის შემდეგაც ტყვია ბავშვისკენ თავდახრილ ინსტრუქტორს მოხვდა.

ჩარლზ ვაკა ნევადის შტატის ლას-ვეგასის უნივერსიტეტის სამედიცინო ცენტრში გადაიყვანეს, მაგრამ მისი გადარჩენა ექიმებმა ვერ მოახერხეს.

9 წლის გოგონა სასროლეთის ტერიტორიაზე მშობლებთან ერთად იმყოფებოდა. სამართალდამცველებმა ტრაგიკული შემთხვევის ამსახველი ვიდეომასალა გაავრცელეს, თუმცა, მასზე საბედისწერო გასროლა ამოჭრილია.