2014-07-02 10:59

გიორგი გვიჩიანი, საქართველოს სახალხო დამცველს, უჩა ნანუაშვილს მისი და ნიკა ჩემიას უფლებების დაცვას სთხოვს. 

"27 ივნისს, პროკურორებმა დასკვნით სიტყვაში, ყოველგვარი მტკიცებულებების გარეშე, კვლავ მოითხოვეს ჩემთვის და ნიკა ჩემიასთვის უვადო პატიმრობის მოსჯა. მთავარი პროკურატურის ეს ქმედება სტალინის 37-იანი წლების გამეორებას წარმოადგენს. ასეთი უკანონობის მიზეზი მთავარი პროკურორის პირველი მოადგილე ირაკლი შოთაძეა, რომელიც 8 წლის წინ, მოცემული საქმის პროკურორი იყო. ბუნებრივია, მას არ სურს ჩვენი გამართლება. 

ბატონო უჩა, თქვენ შესწავლილი გაქვთ აღნიშნული საქმე და კარგად იცნობთ მის აბსურდულობას. უკვე მე-9 წელია, მე და ნიკა ჩემია, უკანონო პატიმრობაში ვიმყოფებით. მოგმართავთ თხოვნით, დაიცვათ ჩვენი უფლებები", - ნათქვამია გიორგი გვიჩიანის მიმართვაში.

2002 წელს "თელასის" მენეჯერი ნიკა ლომინაძე ბახტრიონის ქუჩაზე მოკლული იპოვეს. გიორგი გვიჩიანი აღნიშნული მკვლელობის შეკვეთის ბრალდებით 2006 წელს დააკავეს და მას უვადო პატიმრობა მიუსაჯეს.