2014-06-18 10:57

რიკოთზე მოძრაობა კვლავ აკრძალულია, - ამის შესახებ "ინტერპრესნიუსს" საავტომობილო გზების დეპარტამენტში განუცხადეს. მათივე თქმით, ჯერჯერობით უცნობია, როდის აღდგება რიკოთის უღელტეხილზე საავტომობილო მოძრაობა.

როგორც საგზაო დეპარტამენტში აცხადებენ, სიტუაციას ადგილზე გეოლოგები სწავლობენ. 

"გაწმენდითი სამუშაოები დილიდან განახლდა. როდის გაიხსნება გზა,  ჯერ უცნობია. ველოდებით გეოლოგების დასკვნას, რომლებიც ვითარებას ადგილზე სწავლობენ", - განაცხადეს საავტომობილო გზების დეპარტამენტში.
რიკოთის უღელტეხილის 146-ე კილომეტრზე გუშინ მეწყერი განმეორებით ჩამოწვა.

ხარაგაულის მუნიციპალიტეტის, სოფელ ხევთან 3 ათასი კუბური მეტრი მოცულობის მიწისა და კლდის მასის ჩამოშლამ მთლიანად გადაკეტა საავტომობილო გზის სავალი ნაწილი. აღნიშნულ მონაკვეთზე ყველა სახის ავტოტრანსპორტის მოძრაობა აკრძალულია. 

ავტოტრანსპორტის მოძრაობა გომი-საჩხერე-ჭიათურა-ზესტაფონის საავტომობილო გზით ხორციელდება.