-
2015-11-14 11:31
პირველად 1944 წლის შემდეგ, როცა საფრანგეთი ნაცისტებისგან გაათავისუფლეს, პარიზში კომენდანტის საათი გამოცხადდა. საფრანგეთის პრეზიდენტმა ფრანსუა ოლანდმა ქვეყანაში საგანგებო წესები შემოიღო.
საგანგებო მდგომარეობის შესახებ განცხადება ოლანდმა ტელევიზიით გააკეთა და ფრანგ ხალხს მიუსამძიმრა. "ყველას გასაგონად მინდა ვთქვა, რომ ვაპირებთ დაუნდობელ ბრძოლას მათ წინააღმდეგ, ვინც ეს ყველაფერი დაგეგმა და შეასრულა", - განაცხადა საფრანგეთის პრეზიდენტმა.
ფრანსუა ოლანდის გადაწყვეტილებით, ქვეყნის საზღვრები ჩაიკეტა. პარიზში, საერთო ჯამში, ამ დროისთვის 1.500-ზე მეტი გვარდიელი მონაწილეობს პატრულირებაში, ჟანდარმერიასთან ერთად.
ეიფელის კოშკზე განათება გამორთულია, "ფეისბუქმა" ტერაქტებიდან ცოტა ხანში ღილაკი "მე უსაფრთხოდ ვარ" აამუშავა, რომლის საშუალებითაც პარიზელებს შეეძლოთ ერთმანეთისთვის შეეტყობინებინათ, რომ ტერაქტის შედეგად არ დაზარალებულან.