-
2014-05-14 22:01
ივანე მერაბიშვილმა სააპელაციო სასამართლო პროტესტის ნიშნად დატოვა, მისივე განცხადებით, ის სხდომებს აღარ დაესწრება. როგორც სასამართლოზე გახდა ცნობილი, პატიმრობაში მყოფ მერაბიშვილს 26 მაისის მოვლენებზე განაჩენი არ ჰქონდა წაკითხული. მან მოსამართლე ხათუნა ხარჩილავა რუსული არხის ინტერესების დამცველს შეადარა.
„უნდა გამოგიტყდეთ, რომ განაჩენი არ წამიკითხავს და კიდევ კარგი, არ წავიკითხე... ეს განაჩენი არის სრული სირცხვილი, სასამართლომ და მოსამართლემ არ გაიზიარა ლიტველების და ენდიაის დასკვნა და დაუჯერა ნინო ბურჯანაძეს, ანუ ხარჩილავამ უკანონობა დააკანონა, დააკანონა რუსული აგრესია და ის მოსამართლეები, ვინც მას მხარს დაუჭერენ, მზად არიან, ყველაფერზე მოაწერონ ხელი.
მათ არ გააჩნიათ არც სინდისი და არც ნამუსი. მე ვარ შეურაცხყოფილი ასეთი განაჩენის გამოტანით, არ წამიკითხავს და კიდევ კარგი, არ წავიკითხე! ეს არის ხელმოწერა რუსული პროპაგანდის! მე აღშფოთებული ვარ, თუ რა დაწერა აქ მოსამართლემ.
არაფერი მაინც არ დაეწერა და ისე ეთქვა, რომ ვანო მერაბიშვილი დამნაშავეა, ამას გავიგებდი, მაგრამ როცა ამას წერ, ეს არის უნამუსობა და უსინდისობა. ჩემს საკანში, სადაც ტელევიზორი მიდგას არცერთი საერთაშორისო არხი არ არის და ამიტომ წიგნს ვკითხულობ” – განაცხადა მერაბიშვილმა.
მან პარალელი გაავლო უკრაინისა და 26 მაისის მოვლენებს შორის და აღნიშნა,რომ მოსამართლეები რუსული გრუ-ს ინტერესებს იცავენ და ო-ერ-ტე-ს გმირებს გვანან. მერაბიშვილი დღეს პეტიაშვილის ქუჩაზე, ხერხეულიძის დაჭრის ფაქტს გამოეხმაურა:
"დღეს ჩემს მეგობარს ესროლეს, მე მინდა ავღნიშნო, რომ ყველაზე დაცული ვარ, ასევე მინდა გითხრათ მოსამართლეებო,რომ დატოვეთ ძალაში საქალაქო სასამართლოს გადაწყვეტილება და მე მზად ვარ ვიჯდე ციხეში” – განაცხადა მერაბიშვილმა და დარბაზი დატოვა.