2014-06-13 17:38

სკანდალური ტელეწამყვანი „ფეისბუქის“ საკუთარ გვერდზე წერს, რომ მისი სახელით სხვადასხვა სოციალურ ქსელში, ადამიანები ვირტუალურ და რეალურ პროსტიტუციას ეწევიან, აბამენ ნაცნობობას, ესაუბრებიან, ნიშნავენ შეხვედრებს, სთავაზობენ სხვადასხვა სახის სექსუალურ მომსახურებას და ა.შ.

„არანაირად არ ვაპირებდი ამის სერიოზულად მიღებას, მაგრამ ისეთი არაერთი შემთხვევა გავიგე, რომ იძულებული ვარ, მოგმართოთ და გაგაფრთხილოთ: არ მიყვარს სისტემა, მაგრამ იძულებული ვიქნები, მივმართო სამართალდამცავ ორგანოებს, რომ აღმოიფხვრას ასეთი უსიამოვნო ფაქტები და ყველა ასეთი „ბიზნეს“ ქალბატონი თუ მამაკაცი, თუ ჯგუფები, რომლებიც ახორციელებენ ამ ქმედებებს, მოხვდებიან სამართალდამცავების მიერ პასუხისგებაში, გადაიხდიან შესაბამის ჯარიმებს და მათ მიმართ გამოყენებული იქნება ყველა ის ინსტრუმენტი თუ სანქცია, რომელსაც ფლობს კანონი, კონკრეტულ შემთხვევებში.

ასევე ეს ეხება იმ არაოფიციალურ გვერდებს და ცალკეულ პიროვნებებს, რომლებიც ვაჭრობენ ჩემი სახელით და ავრცელებენ ფოტოებს და ვიდეოებს შეურაცხმყოფელი წარწერებით, შემოსავლის მისაღებად თუ მხოლოდ თქვენთვის ცნობილი მიზნის მისაღწევად. შეურაცხყოფა, ცილისწამება, სხვისი სახელით გამოსვლა, განცხადებების გაკეთება თუ გარიგებების გაფორმება ისჯება კანონით.

იუნა შაფათავა არ არის ბრენდი, მაგრამ ეს არის ჩემი სახელი და მე მას დავიცავ ყველა ჩემს ხელთ არსებული საშუალებით. რაც არ უნდა შემექმნა, ჩამეწერა, დამეწერა, მესაუბრა მე გუშინწინ, გუშინ და ვქმნი დღეს, მხოლოდ ჩემი საკუთრებაა, სახელის ლიცენზიის არსებობის ან არარსებობის მიუხედავად და საკუთარი სახელის გამოყენებაზე და საკუთრებაზე ყველა ადამიანს გააჩნია უფლებები.

კი ბატონო, გაავრცელეთ, რაც საჯაროა, მაგრამ შეურაცხყოფის ნებისმიერი ფაქტი დაისჯება შესაბამისად, გაითვალისწინეთ. ასევე, თავი შეიკავეთ კომენტარებში მტკიცებულებებისგან ჩემს სპეციალიზაცი-ებ-ზე - პროსტიტუციით რომ ვიყო დაკავებული, სიამოვნებით მე თვითონ გამცნობდით ჩემს ახალ პროფესიას, მარკეტინგი და პიარი ბევრზე უკეთ მესმის.

დადასტურებით ვიცით ყველამ, რომ პროსტიტუცია ძალიან სარფიანი ბიზნესია საქართველოში და ფეხით მოსიარულეს ნამდვილად ვერ მიხილავდით ამ შემთხვევაში, ვერც საზოგადოებრივ ტრანსპორტში. ზემოხსენებული ინფორმაცია არ ეხება ფან ფეიჯებს და ჩემი შემოქმედებითი კარიერის თუ ცხოვრებისეული წარმატებების მხარდამჭერებს და კეთილისმსურველებს.

ძალიან მალე სახელზე გავაფორმებ ლიცენზიას და შემდეგ უკვე საქპატენტი დაგეკონტაქტებათ, სიამოვნებით და ყველა ხარჯს თქვენვე დაგაკისრებთ, ისევე, როგორც ამას გააკეთებენ სამართალდამცავი ორგანოები,“ - წერს იუნა შაფათავა.

https://www.facebook.com/yuna.shapatava?fref=nf