2015-01-14 15:05

„ახალგაზრდა იურისტთა ასოციაციის“ ყოფილი თავმჯდომარე, კახა კოჟორიძე პრეზიდენტ გიორგი მარგველაშვილის მრჩევლად დაინიშნა.

როგორც „ალია“ წერს, კოჟორიძის საშუალებით უზენაესი სასამართლოს თავმჯდომარის პოსტზე „რესპუბლიკელების“, „ნაციონალების“ და „თავისუფალი დემოკრატებისთვის“ სასურველი კანდიდატების „შეცურება“ მოხდება.

თუმცა, არსებობს მეორე ვერსიაც, რომლის თანახმადაც, პროფესიონალი იურისტები კახა კოჟორიძეს საინტერესო ახალგაზრდად მიიჩნევენ და პრეზიდენტის მრჩევლად მის დანიშვნას მიესალმებიან.

 „ჩემი დანიშვნა კონკრეტულ ამბავს არ უკავშირდება. მეტიც, არ უკავშირდება უზენაესი სასამართლო თავმჯდომარის შერჩევის პროცესს.

სულ ახლახან დამიმთავრდა საია-ს თავმჯდომარეობის მეორე ვადა, ეს შემოთავაზება მივიღე და დავთანხმდი.

მე, როგორც პრეზიდენტის მრჩეველი, ადამიანთა უფლებებისა და მართლმსაჯულების საკითხში, რა თქმა უნდა ვიქნები ჩართული უზენაეს სასამართლოს თავმჯდომარის კანდიდატურის შერჩევის პროცესში, მაგრამ ჩემი პოზიცია იყო და არის ის, რომ მე საქართველოს პრეზიდენტს არ შევთავაზებ კონკრეტულ გვარებს, არამედ შევთავაზებ ჩემს მოსაზრებებს, თუ როგორ ვხედავ ამ პროცესს და რა გზა მიმაჩნია სწორად, რომ იქნას შერჩეული მთავარი მოსამართლე.

ეს არის ძალიან მნიშვნელოვანი თანამდებობა ჩვენი ქვეყნისთვის“, - აცხადებს კახა კოჟორიძე.

„ალია“