გაურკვეველ ვითარებაში 15 ივლისს გარდაცვლილი ეროსი კიწმარიშვილისა და მილიარდერის, საქართველოს ყოფილი პრემიერმინისტრის ბიძინა ივანიშვილის ბიზნეს-ურთიერთობებზე infonet.ge (საქართველოს საინფორმაციო ქსელი) წერს.
„ეს, შესაძლოა, ჩვენს წარსულ ბიზნეს-ურთიერთობებს უკავშირდებოდეს“, - ეს განცხადება გაურკვეველ ვითარებაში გარდაცვლილმა ეროსი კიწმარიშვილმა 2011 წელს ბიძინა ივანიშვილის ღია წერილის საპასუხოდ გააკეთა. ამ ღია წერილში ეროსი კიწმარიშვილი ივანიშვილმა რამდენჯერმე ახსენა, რასაც თავად კიწმარიშვილმა მოულოდნელი უწოდა.
ივანიშვილმა “ქართული პარტია” ფსევდოოპოზიციურად მოიხსენია, ეროსი კიწმარიშვილს კი, ხელისუფლების დაკვეთის შემსრულებელი უწოდა. ივანიშვილმა სწორედ ამის გამო გამორიცხა მასთან და "ქართულ პარტიასთან" თანამშრომლობის შესაძლებლობა.
“მე ვეკითხები "მაესტროს" ჟურნალისტებს და თუნდაც მის ადმინისტრაციასა თუ დამფუძნებლებს - როდესაც ტელევიზიას მართავს ფსევდოოპოზიციონერის, ეროსი კიწმარიშვილის კომპანია, ადამიანის, რომელმაც სხვას რომ თავი დავანებოთ, მისივე აღიარებით 2008 წელს დღევანდელ ხელისუფლებასთან ერთად დაასამარა ხალხის რეალური არჩევანი, შეიძლება თუ არა, რომ ვიღაცას ჰქონდეს ილუზია, რომ ასეთი ტიპის ადამიანი გახდება თავისუფალი სიტყვის გარანტი?” – ნათვამია ბიძინა ივანიშვილის წერილში.
“იმავე საღამოს თქვენ ეროსი კიწმარიშვილი გყავდათ სტუმრად და თუ პირველ გადაცემაში თქვენ ნამდვილად მოწოდების სიმაღლეზე იდექით, კიწმარიშვილთან საუბრისას საოცრად დათრგუნული, ყალბი, უნიათო ბრძანდებოდით და აშკარად გეტყობოდათ, რომ დაკვეთას ასრულებდით”, – განაცხადა ივანიშვილმა.
ესაა ამონარიდები ივანიშვილის 2011 წლის ღია წერილიდან, რომელსაც ეროსი კიწმარიშვილმა უპასუხა და აღნიშნა, რომ მისთვის მოულოდნელი იყო ბიძინა ივანიშვილის მხრიდან მისი პერსონით ასეთი გაღიზიანება.
„ეს, შესაძლოა, ჩვენს წარსულ ბიზნეს-ურთიერთობებს უკავშირდებოდეს“, - განაცხადა „ქართული პარტიის“ პოლიტიკურმა მდივანმა, თუმცა მას არ დაუკონკრეტებია, რა ბიზნესი აკავშირებდა ივანიშვილს კიწმარიშვილთან.
მაშინ ნეტგაზეთი წერდა იმის შესახებ, რომ ივანიშვილის ფონდ "ქართუდან" ეროსი კიწმარიშვილის ფონდმა "ორიათას ოცი(2020)" 2009 წელს 564 450 ლარი მიიღო შესწირის სახით.
“ინფორმაცია, მე მგონი, მცდარია, მე ეროსი არასდროს არ დამიფინანსებია, გულწრფელად გეუბნებით. შეგიძლიათ ეს ინფორმაცია წერილობით გამოაქვეყნოთ და გაგცემთ შემდეგ პასუხს”, – განაცხადა ბიძინა ივანიშვილმა.
ინფორმაცია იმის თაობაზე, რომ ივანიშვილის ფონდმა მართლაც გადაურიცხა თანხა ფონდ 2020–ს, “ნეტგაზეთს” თავად ივანიშვილის კუთვნილმა “ქართუ ჯგუფმა” მიაწოდა. რაც შეეხება თავად ფონდ 2020–ს, მისი დამფუძნებელი და თავმჯდომარე რომ ნამდვილად ეროსი კიწმარიშვილია, ეს სამეწარმეო რეესტრის ამონაწერითაა დადასტურებული.
იმავე ამონაწერში მითითებულია, რომ ფონდს რამდენიმე დირექტორი ჰყავს, კერძოდ: ნოდარ რაზმაძე, რევაზ ადამია და ლევან ტვილდიანი", - წერდა „ნეტგაზეთი“.