-
2014-07-15 23:26
გაზეთ "პრაიმტაიმის" ჟურნალისტი, ქეთი ხატიაშვილი, გადაცემა "არჩევანში" მისი და ეროსი კიწმარიშვილის სატელეფონი საუბრის შესახებ ჰყვება, რომელიც გუშინ შედგა. ჟურნალისტის თქმით, მას კიწმარიშვილმა რამდენჯერმე დაურეკა, დღეს კი მათ შორის შეხვედრა უნდა შემდგარიყო.
ქეთი ხატიაშვილის თქმით, კიწმარიშვილს მასთან საუბარი სამომავლო გეგმებზეც ჰქონდა, ამიტომ მისი თვითმკვლელობის ვერსიას ეჭვისთვალით უყურებს.
„ეროსი კიწმარიშვილმა გუშინ დამირეკა. უნდოდა ჩემთან შეხვედრა, მაგრამ, ვინაიდან ვიყავი ბავშვთან ერთად ანანურში, მან მითხრა, რომ როგორც კი ჩამოხვალ, შემეხმიანეო. მან არაერთხელ დამირელა. დღეს, დილით მე უნდა შევხმიანებოდი. იქიდან გამომდიანრე, რომ ჩვენთან, „პრაიმტაიმში“ იყო სარედაქციო თათბირი, ვერ მოვახერხე მასთან დილით შეხმიანება.
მოგვიანებით ვაპირებდი მასთან დაკავშირებას. რაღაც შეხვედრებიც მქონდა. ერთი საათი ვისაუბრეთ ტელეფონზე, ვრცლად. ძირითადი საუბარი გვქონდა მედიისა და ხელისუფლების ურთიერთობაზე. ისაუბრა სამომავლო გეგმებზე, „მაესტროზე“, „რუსთავი 2“-ზე.
მას „მაესტროსთან“ სასამართლო დავა ჰქონდა. „რუსთავი 2“-ზე თვლიდან, რომ დაიბრუნებდა, რადგან მისი ტელევიზია იყო. თუმცა, ოპტიმისტურად არ იყო განწყობილი. რეალურად უყურებდა, ფიქრობდა, რომ ეს შეიძლებოდა ხანგრძლივი პროცესი იყო. მას შორს მიმავალი გეგმები ჰქონდა. ის ძალიან ოპტიმისტურად, ენერგიულად იყო განწყობილი, საბრძოლო შემართება ჰქონდა. ჩემთვის შოკი, მოულოდნელობა იყო.
თვითმკვლელობა ჩემთვის დაუჯერებელია, იქიდან გამომდინარე, რომ მას, რამდენიმე სერიოზული პოლიტიკური პარტია წაუგია თავის კარიერის განმავლობაში და არ ჩავარდნილა დეპრესიაში. არ იყო მიდრეკილი პესიმისტური განწყობებისკენ. ის, ყოველთვის უცდიდა დროს, რომ დადგებოდა მისი დრო, პოზიტიური ადამიანი იყო, წარმოუდგენელია, რომ თავი მოეკლა.
მრავალფეროვანი ურთიერთობები ჰქონდა ყველა მიმართლებით, მიჭირს რაიმეს თქმა. ალბათ, მაინც გამოძიებას უნდა დაველოდოთ და მოტივი გავიგოთ. რა მოტივს შემოგვთავაზებს გამოძიება, არ ვიცი, მაგრამ ჩემთვის უფრო მკვლელობას ჰგავს, თუმცა, არ მინდა წინასწარ დასკვნები ვაკეთო“, - განაცხადა ჟურნალისტმა.