2015-03-15 21:36

ტელეარხ „GDS“-ზე, გადაცემაში „კვირის 2030“ საუბრის დროს ყოფილმა პრემიერმინისტრმა ბიძინა ივანიშვილმა განაცხადა, რომ საზოგადოება უნდა გაუფრთხილდეს არჩევის უფლებას, რომელიც 9 წელი არ ჰქონდა და მოიპოვა, თუ ამის გააზრება არ მოხდა, შესაძლოა, ახალი ტიპის უბედურება მივიღოთ.

ბიძინა ივანიშვილის განცხადებით, მოსახლეობამ ხელისუფლება უნდა აკონტროლოს, მაგრამ ის არ უნდა მოსთხოვოს, რისი გაკეთების თეორიული შანსი არ არსებობს. მისი თქმით, „ნაციონალური მოძრაობა“ სწორედ აქეთკენ მოუწოდებს მოსახლეობას.

„ჩვენ საუბედუროდ სხვაგან ვერ მოვასწარით, თუ ვერ მოვახერხეთ გვესწავლა, როგორ უნდა გვემართა საკუთარი ქვეყანა. გამოცდილება არ გვქონდა და ყველა ტიპის უბედურება, რაც კი შეიძლება არსებობდეს თეორიულად ყველაფერი გადავიტანეთ საკუთარ თავზე. ხელისუფლება უნდა აკონტროლოს საზოგადოებამ, მაგრამ ისეთი რამ არ უნდა მოსთხოვოს, რისი მიღწევის თეორიული შანსიც კი არ არსებობს“, - განაცხადა ივანიშვილმა.

გადაცემაში საზოგადოება „2030“-ში გაწევრიანების პრინციპების შესახებაც ისაუბრეს. როგორც გაირკვა, ამჟამად წევრები შერჩეულია სპონტანურად, თავად ბიძინა ივანიშვილის მიერ, რაც შეეხება გაწევრიანების მსურველებს, საზოგადოება მუშაობს პრინციპების შემუშავებაზე, რის შემდეგაც ის ცნობილი გახდება ორგანიზაციის ვებგვერდის საშუალებით.