მამა პეტრე MYREST.GE-სთან საუბარში მარხვაზე, მის დანიშნულებაზე და სხვადასხვა სამარხვო კერძების შესახებ საუბრობს, რომლებიც, მისი თქმით, ადამიანმა მარხვის დროს კომფორტის შესაქმნელად გამოიგონა.
„თუ შენ მარხულობ და ლოცულობ, იცხოვრე შენთვის. ნუ აკეთებ ამას,რომ თითქოს მე მიდგები ჯიბრში. ასეთი ადამიანი უფრო მეტად დაშორდება ღმერთს. შემდეგ ადამიანები საკუთარ თავს ეკითხებიან „თუ მე ვმარხულობ, ვლოცულობ, ვცხოვრობ ეკლესიურად და მაინც არაფერი გამომდის, რა გამოდის?“ . ეს არის მარხვა თავის მოწონებისათვის და ასეთი ადამიანი ღმერთს უფრო და უფრო დაშორდება.
რაც არ უნდა მძიმედ ვიცავდეთ მარხვას, მას მაინც ვარღვევთ. მარხვა არ არის მხოლოდ საკვებზე უარის თქმა. მარხვა ეს არის განკითხვაზე, ჭორაობაზე, სიძულვილზე, შურზე, კამათზე უარის თქმა. ვინც თვლის, რომ მარხვა არ დაურღვევია ის ძალიან ცდება.
ვინც ფიქრობს, რომ მარხვა მხოლოდ საკვებზე უარის თქმაა, მან არ იცის მარხვის მნიშვნელობა. ყველა ადამიანს ქრისტესთან მისასვლელი თავისი ბილიკი გააჩნია. ჩვენ არ ვიცით ვინ რითი ცხონდება და ვინ რითი დაუახლოვდება უფალს. მთავარი ის არ არის ვინ რა შესცოდა, მთავარია ვის რამდენად დიდი მადლი გააჩნია ადამიანს ცხოვრებაში.
ჩვენ იმდენად კომფოტი შევიქმენით მარხვის პერიოდში და გამოვიგონეთ იგივე სამარხვო საკვები, რაც ადამიანს მარხვას უადვილებს. სამარხვო სოსისები, ყველი, ნამცხვრები - ეს ყველაფერი იმ ადამიანებისთვისაა, ვინც გარეგნულად მარხულობს. მარხვა არ არის იმაზე ფიქრი თუ რა უნდა მიირთვა. მარხვა არის იმაზე ფიქრი, სულიერად რა უნდა მიირთვა.
