"მაქვს პრეტენზია, რომ შევცვალოთ დღის წესრიგი, რომელიც დღეს მედია სივრცეში მიჰყავს "რუსთავი 2-ს", - ამის შესახებ ყოფილმა პრემიერ-მინისტრმა ბიძინა ივანიშვილმა "კვირის პალიტრასთან" მიცემულ ინტერვიუში განაცხადა.
ამ განცხადების მიუხედავად ივანიშვილი აქვე აღნიშნავს, რომ მას არ აქვს პრეტენზია იმაზე, რომ დღეს მედია სივრცეში დღის წესრიგი მიჰყავს "რუსთავი 2"-ს, რომელიც მისი თქმით არის ნაციონალური მოძრაობის "აგიტმანქანა." როგორც ის აღნიშნავს რაც უფრო კარგად იფუნქციონირებს "რუსთავი 2," მით უფრო კარგად დაინახავს საზოგადოება კონტრასტს.
"თავის დროზე "რეალ TV" იყო ჩემი "სპარინგპარტნიორი" და მე კარგად ვაჩვენებდი საზოგადოებას რეალობას. დღეს "რუსთავი 2" გაფართოებულ "რეალ TV"-ს წარმოადგენს და მას სიამოვნებით გავიხდიდი "სპარინგპრტნიორად"- აღნიშნა ივანიშვილმა.
"კვირის პალიტრასთან" ინტერვიუში ყოფილი პრემიერ-მინისტრი პირდაპირ აცხადებს, რომ მას და მის გუნდს აქვს პრეტენზია ზოგადად მედია სივრცეში გარკვეული ცვლილებები მოახდინონ.
"ჩვენ მოვახერხებთ, შევცვალოთ დღის წესრიგი"-აღნიშნავს ივანიშვილი და აქვე განმარტავს, რომ დღეს საქართველოში არის უპრეცედენტოდ თავისუფალი მედია.
