2015-02-05 22:29

"ხელისუფლება დიდად არ გვწყალობს ჩვენ, მაგრამ მართალი გითხრათ, ეგ არც გვჭირდება - არც ჩვენ ვწყალობთ მას, მაგრამ ხელისუფლებას შეუძლია უსამართლოდ შეგვიქმნას უფრო დიდი პრობლემები, ვიდრე შეგვიძლია ჩვენ - მას შევუქმნათ", - ამის შესახებ სამაუწყებლო კომპანია "რუსთავი-2"-ის გენერალურმა დირექტორმა ნიკა გვარამიამ "Forbes Georgia"-სთან საუბარში განაცხადა.

ნიკა გვარამიას თქმით, "რუსთავი-2"-ის სარედაქციო პოლიტიკა თვისობრივად განსხვავდება ხელისუფლების იდეოლოგიისაგან, რომლის საგარეო ვექტორი გაურკვეველია, ხოლო ბუნებით ხელისუფლება მკვეთრად მემარცხენეა, კომპანიის სარედაქციო პოლიტიკა კი - მემარჯვენე. 

ნიკა გვარამია ინტერვიუში ამბობს, რომ წინა ხელისუფლება ფარულ მოსმენებს იყენებდა პოლიტიკური მოწინააღმდეგეების მიმართაც და ეს იყო ყველაზე დიდი შეცდომა, რაც მან დაუშვა. გვარამიას თქმით, მას არ მიუღია გადაწყვეტილებები ამ საკითხთან დაკავშირებით, მაგრამ იმ შეცდომის ნაწილი თვითონაც ყოფილა. 

თუმცა, ნიკა გვარამიას თქმით, ამ ხელისუფლებას უკვე აქვს ის გამოცდილება, რაც წინა ხელისუფლებისთვის სავალალოდ დასრულდა, მაშინ როცა წინას ეს გამოცდილება არ ჰქონდა: "ფაქტია, რომ სავარაუდოდ, არანაკლები მასშტაბებით იყენებენ ამ მხრივ ტექნიკურ შესაძლებლობებს, რომელზე საუბარიც ამ შემთხვევაში კონკრეტულად არ შემიძლია, მაგრამ შეიცვლება თუ არა ხელისუფლება, მეორე დღესვე გვეცოდინება - ვის იწერდნენ, რამდენს იწერდნენ და რა საშუალებებს იყენებდნენ", - ამბობს "რუსთავი-2"-ის გენდირექტორი.

მისივე თქმით, ერთადერთი თემა, რასაც ხელისუფლება ახლა "რუსთავი-2"-ის წინააღმდეგ ამუშავებს, სამოქალაქო სარჩელია კომპანიის მესაკუთრეობის ფორმასთან დაკავშირებით, რათა პრობლემები შეუქმნან ამჟამინდელ მფლობელებს. 

forbs.ge-ს ვიდეო: ფრაგმენტები ინტერვიუდან