2015-03-10 13:02

"ჯეოსელის" მიერ გამოცხადებულ აქციას GeocellSay - "გააგებინე ყველას ჯეოსელთან ერთად", რომელიც კომპანიის ვებგვერდზე გზავნილების გაგზავნასა და თბილისის ქუჩებში მათ განთავსებას გულისხმობდა, აჟიოტაჟი მოჰყვა სოციალურ ქსელ "ფეისბუქში".

გაუგებრობა გამოიწვია ბანერმა რუსული "გეორგიევსკის ლენტებით" და წარწერამ "მე ვამაყობ", რომელიც ვებგვერდზე "ევრაზიული არჩევანის" ადგილობრივმა ლიდერმა ირაკლი ყიფიანმა გაგზავნა. სწორედ მან ატვირთა ბილბორდის ფოტო საკუთარ გვერდზე და დაწერა, რომ მსგავს ლენტებს კიდევ ბევრს პირდება მოსახლეობას. 

"ჯეოსელმა" აქციის ფარგლებში შემოსული 16, 280 პოსტიდან თბილისის ქუჩებში 5670 განათავსა. ფიჭური კავშირგაბმულობის კომპანიას უამრავი ადამიანი დაუკავშირდა, რომლებმაც გულისწყრომა გამოთქვეს "გეორგიევსკის ლენტისანი" გზავნილის განთავსების გამო. რამდენიმე იუზერმა პირდაპირ დაწერა, რომ პროტესტის ნიშნად უარს ამბობს "ჯეოსელის" აბონენტობაზე.

გზავნილის განთავსება მით უფრო გაუგებარია, რომ პირობების მიხედვით, არ უნდა გამოქვეყნებულიყო არც სარეკლამო, არც პოლიტიკური შინაარსის გზავნილები. "ჯეოსელში" აცხადებენ, რომ კომპანია არკვევს, როგორ მოხვდა გზავნილი ბილბორდზე. 

"ეს ინფორმაცია იგზავნება სიეტლში, სადაც გადის ფილტრაციას, რადგან მათი პროექტია. ჩვენ გადავწყვიტეთ, რომ არ ჩავრეულიყავით არც ტექნიკურად და პროექტი დაგვეტოვებინა ისეთივე მარტივად, როგორიც იყო. ჩვენთვისაც არ არის კარგი ის, რაც ხდება, მაგრამ დროის ფაქტორია,აუცილებლად გავარკვევთ რა მოხდა. ვცდილობთ გავარკვიოთ, მივიღოთ ზომები, თუ რატომ გამოქვეყნდა ეს ინფორმაცია და ამის შესახებ განცხადებასაც გამოვაქვეყნებთ", - უთხრეს "ჯეოსელში" საინფორმაციო სააგენტო "აქცენტს".