2014-10-26 23:30

"პოსტსკრიპტუმმა" მოამზადა სიუჟეტი, რომელიც საქართველოს მთავრობის მიერ ლობისტურ კომპანიებთან გაფორმებულ ელშეკრულებებსა და გადახდილ მილიონებს ეხება.

დოკუმენტში, რომელიც ოპოზიციამ მთავრობის ადმინისტრაციიდან გამოითხოვა, სახელმწიფო ბიუჯეტიდან ლობისტური კომპანიებისთვის გადარიცხული თანხებია ასახული. 4 მილიონ ლარზე მეტი ერთ წელიწადსა და 9 თვეში.

ასეთია, საკონსულტაციო მომსახურებისთვის გაღებული ხარჯები, თუმცა ეს ლობისტებისათვის ბიუჯეტიდან გამოყოფილი თანხების მხოლოდ ერთი ნაწილია. ოპოზიციაში აცხადებენ, რომ ამაში არ შედის მათი საქართველოში ჩამოსვლის, სასტუმროსა და სხვა ხარჯები.

მმართველი გუნდისათვის „პატონბოქსის“ ფასი და მომსახურების ხარისხი მისაღები აღმოჩნდა. მთავრობაში აცხადებენ, რომ ლობისტური კომპანია საერთაშორისო ტენდერის გარეშე დაიქირავეს, შესაბამისად სხვა კომპანიას არ ჰქონდა საშუალება მათთვის აღნიშნული მომსახურება გაეწია.

ოპოზიციას ეჭვი აქვს, რომ ლობისტური კომპანია, რომლის მომსახურებაც საქართველოს ბიუჯეტს უკვე დაუჯდა 4 მილიონ ლარზე მეტი რეალურად არა ქვეყნის, არამედ ქართული ოცნების პარტიულ ინტერეს ემსახურება. ეჭვს ერთი გარემოებაც ამყარებს- ქართული ოცნების ხელისუფლებაში მოსვლამდე „პატონბოქსის“ სწორედ ამერიკის შეერთებულ შტატებში „ქართული ოცნების„ ინტერესებს ლობირებდა.

პოსტსკრიპტუმმა კოალიცია „ქართული ოცნება - ბიძინა ივანიშვილის“ მიერ 2012 წლის საპარლამენტო არჩევნების წინ „პატონ ბოქსისათვის გადარიცხული თანხების დამადასტურებელი დოკუმენტი მოიპოვა, სადაც ჩანს რომ არჩევნების თარიღის მოახლოვებასთან ერთად იზრდებოდა კოალიციის მიერ ლობისტებისათვის გადარიცხული თანხის ოდენობა.

2012 წელს მხოლოდ ერთ ლობისტურ კომპანიას ქართულმა ოცნებამ შვიდი მილიონი ლარი გადაუხადა. ხელისუფლებაში მოსვლიდან რამდენიმე თვეში „პატონბოქსთან“ ხელშეკრულება უკვე ქართული ოცნების ნაცვლად საქართველოს მთავრობის სახელით გაფორმდა.

კახა კუკავა აცხადებს, რომ ხელისუფლებამ ლობისტური კომოპანია თითოეული მოქალაქის ჯიბიდან ამოღებული ფულით დაიქირავა და ამისათვის ისინი სისხლის სამართლის პასუხისგებაში მიეცემიან. მისი თქმით სწორედ ამ ხელისუფლებამ დაუშვა ასეთი პრეცენდენტი, როდესაც გიგა ბოკერიას წინააღმდეგ ასევე ბიუჯეტის ფულით ლობისტური კომპანიების დაქირავებაზე საქმე აღძრა.

„პატონბოქსი“ ცნობილი ამერიკული ლობისტური კომპანიაა, რომელსაც საქართველოს მთავრობის გარდა ათობით სხვა კონტრაქტორი ჰყავს მათ შორის არის რამდენიმე გავლენიანი ამერიკული და ევროპილი კორპორაცია, თუმცა ოპოზიციის განსაკუთრებულ ყურადღებას „პატონბოქსის“ ორი დამკვეთი, „გაზპრომბანკი“ და „როსტეფი“ იქცევს.

წყარო