2014-10-18 21:40

„ტაბულის“ ინფორმაციით International New York Times დაუკავშირდა agenda.ge-ს და მოსთხოვა გასწორდეს ინფორმაცია, თითქოს International New York Times-მა საქართველოს პარლამენტის თავმჯდომარის სტატია გამოაქვეყნა.

International New York Times ამბობს, რომ agenda.ge-ს მიერ დაკვეთილი ტექსტი განთავსდა როგორც რეკლამა სარეკლამო გვერდზე, შესაბამისი გრაფიკით, გამოცემის სარეკლამო რეგლამენტის დაცვით.

გამოცემა „ტაბულას“ თანახმად agenda.ge-ს მთავარმა რედაქტორმა ნატა ამაღლობელმა „ტაბულასთან“ საუბარში ჯერ უარყო, რომ ფული გადაიხადეს პარლამენტის თავმჯდომარის წერილის განთავსებაში, შემდეგ კი განაცხადა, რომ ეს ინფორმაცია კონფიდენციალურია.

საქართველოს ფინანსთა მინისტრმა ნოდარ ხადურმა ჟურნალისტებთან კომენტარში განაცხადა, რომ სტატიის განთავსებაში ბიუჯეტის თანხა არ დახარჯულა, რადგან agenda.ge, რომელიც International New York Times-ში გამოქვეყნებული სტატიის ქვეშ მითითებულია, როგორც დამკვეთი, არ არის საბიუჯეტო ორგანიზაცია.

agenda.ge-ზე მითითებულია, რომ პორტალი შექმნილია საქართველოს მთავრობის მიერ. მისი ოფისი ინგოროყვას ქუჩაზე მდებარეობს, რედაქციის ტელეფონის ნომრად კი მითითებულია იგივე ნომერი, რაც მთავრობის კანცელარიას აქვს.

შეგახსენებთ, თავად დავით უსუფაშვილმა გაკვირვება გამოთქვა International New York Times-ში მისი სტატიის დაბეჭდვის გამო და განაცხადა, რომ სტატია გამოსაქვეყნებლად მხოლოდ agenda.ge-ს გაუგზავნა.

“ბიძინა ივანიშვილი ის ადამიანია, რომელმაც მთელი თავისი ცხოვრება, ტალანტი, ნიჭი და ფული სამშობლოს მიუძღვნა. აწარმოებს წარმოუდგენელი მასშტაბის ქველმოქმედებას. მან რიგითი ჯარისკაცის მსგავსად სიცოცხლე სამშობლოს შესწირა. მან ბევრად მეტი წელი გაატარა ქვეყანაზე ზრუნვაში, ვიდრე ერთად აღებულმა პუტინმა და სააკაშვილმა” - ვკითხულობთ პარლამენტის თავმჯდომარის დავით უსუფაშვილის სტატიაში, რომელსაც დღევანდელი International New York Times-ის ფურცლებზე ნახავთ.