2014-09-20 22:24

„ამდენი წელი სიკეთის გარდა რა გაგვიკეთებია და ახლა, როცა მინდა თბილისში დაბრუნება და ჩემი საქმიანობის გაგრძელება, ეს არ უნდა შემეძლოს?“- ამის შესახებ საქართველოს ყოფილმა პირველმა ქალბატონმა, მიხეილ სააკაშვილის მეუღლემ სანდრა რულოვსმა ამსტერდამიდან ჩართვის დროს განაცხადა.

სანდრა რულოვსი მისთვის 20 წლის მამის მიერ ნაჩუქარი ბინის დაყადაღების ფაქტსაც შეეხო: „ეს ნიშნავს, რომ როცა ბინაში ვიქნებით, იქ ვიღაცა მოვა და გაგვიყვანს იქედან, ჩემი შვილის თვალწინ - ეს არ მინდა განვიცადო. ნუთუ საქართველოში ჩემი ყოფნის ოცი წლის შემდეგ ეს დავიმსახურე?“

მისი თქმით, არ სურდა, რომ ნიკუშას, რომელიც საქართველოში ცხოვრობდა, იქ ჰყავდა მეგობრები, შეეცვალა გარემო და ერთი ან ორი წლით სხვა ქვეყანაში ეცხოვრა და ეს იყო მიზეზი, რის გამოც მეუღლეს აშშ-ში არ გაჰყვა და საქართველოში დარჩა.

სანდრა რულოვსის თქმით, „პოლიტიკა პოლიტიკაა და ეს კარგი საშუალებაა იმისთვის, გაერკვე, ვინაა მეგობარი და ვინ მედროვე, მაგრამ საქართველოში ყოფნის დროს მე არ მიგრძვნია არანაირი მტრობა ხალხისგან“.