-
2015-08-25 17:21
ქობულეთში, ზღვაში ცურვის დროს გაზეთ "ქრონიკა+"-ის ჟურნალისტი დათო დევიძე დაიხრჩო. ინფორმაციას გაზეთის დამფუძნებელი და მთავარი რედაქტორი ელისო კილაძე ადასტურებს.
დათო დევიძის მოულოდნელი დაღუპვის მიზეზი, სავარაუდოდ, გულის უკმარისობაა. ის ზღვაში ნაპირთან ახლოს ცურავდა, როცა წყალში გაუჩინარდა. ამის შესახებ 112-ს მისმა მეუღლემ შეატყობინა, რომელიც ნაპირზე იმყოფებოდა. მაშველებმა დათო დევიძე ზღვიდან უკვე გარდაცვლილი ამოიყვანეს.
დათო დევიძე სხვადასხვა დროს სხვადასხვა გამოცემებში მუშაობდა, მათ შორის, "კვირის პალიტრაში", ბოლოს კი "ქრონიკა+"-სთვის წერდა. კოლეგები მას იცნობდნენ როგორც უაღრესად კეთილ, თავმდაბალ და გაწონასწორებულ პიროვებას. დათო 50 წლის იყო, მას მეუღლე და ორი შვილი დარჩა.
"აფხაზეთის ხმა" მწუხარებას გამოთქვამს მომხდარის გამო და სამძიმარს უცხადებს დათო დევიძის ოჯახსა და კოლეგებს "ქრონიკა+"-დან.