2014-07-27 12:36

ყოფილი პრეზიდენტის, მიხეილ სააკაშვილის პროკურატურაში დაკითხვაზე დაბარებასთან დაკავშირებით, „ნაციონალური მოძრაობის“ პოლიტსაბჭოს წევრმა ზაზა ბიბილაშვილმა საპრეზიდენტო ბიბლიოთეკაში  ბრიფინგი გამართა.

მისი თქმით, მიხეილ სააკაშვილი არ აპირებს, ჩაერთოს პუტინისა და ოლიგარქის ერთობლივ თამაშში და საქართველოს თავისუფლებისთვის ბრძოლას ბოლომდე გააგრძელებს.

„ყოფილი პრეზიდენტის დაკითხვაზე დაბარებასთან დაკავშირებით პროკურატურის პრესცენტრმა ღამის 11 საათამდე არაფერი იცოდა, რაც „გვაფიქრებინებს, რომ უწყება რეალურად გაიგზავნა ივანიშვილის რეზიდენციიდან, ხოლო პროკურატურა მხოლოდ შემდეგ ჩააყანეს საქმის კურსში.

ნებისმიერი კეთილსინდისიერი ადამიანისთვის ნათელია, რომ ამ პროცესს სამართლებრივ საკითხებთან არაფერი აქვს საერთო და ეს არის პოლიტიკური დევნა.

ხელისუფლება, რომელმაც ტოტალურად მოატყუა საქართველოს მოსახლეობა, რომლის ერთპიროვნული ლიდერი გაექცა პასუხისმგებლობას და კულუარებიდან მართავს ქვეყანას, ცდილობს, ჩამოიშოროს მთავარი პოლიტიკური კონკურენტი.

იმ დროში, როცა მთელი მსოფლიო გაერთიანებულია და ებრძვის პუტინის იმპერიას, „გაზპრომის“ აქციონერი და საქართველოს რეალური ხელისუფალი ბიძინა ივანიშვილი რჩება პუტინის მოკავშირედ და აგრძელებს მისი ინტერესების გატარებას საქართველოში.

ეს ნაბიჯი არის ოლიგარქის საპასუხო ნაბიჯი სააკაშვილის საერთაშორის აქტიურობაზე, განსაკუთრებით უკრაინაში", - განაცხადა ბიბილაშვილმა.