-
2014-07-26 21:36
საპარლამენტო უმრავლესობის წევრის, ელისო ჩაფიძის თქმით, „ქართული ოცნების“ ერთ-ერთ დამფუძნებელს (რომლის სახელსაც იგი არ ასახელებს), ჰქონდა მცდელობა ტყიბულში თანამდებობები საკუთარი კადრებით დაეკომპლექტებინა.
„გარკვეულ დაპირისპირებას ჰქონდა ადგილი ჩემსა და „ქართული ოცნების“ ერთ-ერთ დამფუძნებელს შორის, რომელიც ტყიბულში გარკვეული საკითხის გადაჭრას ცდილობდა.
მაქსიმალურად ვიბრძოლებ იმისათვის, რომ რუხი კარდინალების ჩარევა ჩემი რაიონის ცხოვრებაში არ განხორციელდეს.
ეს ნამდვილად არ არის ჩემი ქართული ოცნება. გუნდის დატოვებას არ ვაპირებ, რადგან ბევრი საქმე მაქვს გასაკეთებელი ამ გუნდთან ერთად", - განაცხადა ჩაფიძემ.
გავრცელებული ინფორმაციით, ტყიბულის მაჟორიტარი დეპუტატი მცხეთა-მთიანეთის გუბერნატორს ნუგზარ ყიფიანს უპირისპირდება.
რამდენიმე კვირის წინ, ტყიბულის საკრებულოს სხდომაზე „ქართული ოცნების” 13 წევრმა საკრებულოს თავმჯდომარე ვერ აირჩია, რასაც ელისო ჩაფიძე საბოტაჟის მოწყობის მცდელობას და ნუგზარ ყიფიანის საკრებულოს საქმიანობაში ჩარევას უკავშირებს.
როგორც ირკვევა, ტყიბულის მუნიციპალიტეტის გამგეობის შენობის წინ ,,ქართული ოცნების” წარმომადგენელთა ნაწილს გამგებელი რობიზონ გვენეტაძე და მცხეთა-მთიანეთის გუბერნატორი ნუგზარ ყიფიანი შეხვდნენ, რომელიც საპარლამენტო და საპრეზიდენტო არჩევნების დროს ტყიბულში "ქართული ოცნების” საარჩევნო შტაბის ხელმძღვანელი იყო.
რობიზონ გვენეტაძის განცხადებით, ნუგზარ ყიფიანის ტყიბულში იმის გამო ჩავიდა, რომ საკრებულოს თავმჯდომარედ "ქართული ოცნების” კანდიდატი თამაზ კუბლაშვილი მშვიდობიანად და ხმების უმრავლესობით იქნას არჩეული.
შეგახსენებთ, რომ ნუგზარ ყიფიანი ბიძინა ივანიშვილთან დაახლოებული პირია.