-
2017-03-04 00:38
"დღეს არ არსებობს საშიშროება, რომ “რუსთავი 2”-ში რამე მოხდება, მხარდამჭერებს კი 12 მარტს რუსთაველზე დაგეგმილ აქციაზე მოსვლისკენ მოვუწოდებთ", - ეს განცხადება "რუსთავი-2"-ის შენობის წინ მიმდინარე საპროტესტო აქციის ორგანიზატორებმა გააკეთეს და აქცია დროებით შეწყვიტეს.
ამ გადაწყვეტილების მიღება სტრასბურგის ევროსასამართლოს მიერ მიღებულმა გადაწყვეტილებამ განაპირობა, რომელმაც "რუსთავი-2"-თან დაკავშირებული საქართველოს უზენაესი სასამართლოს გადაწყვეტილების აღსრულება 8 მარტამდე შეაჩერა.
როგორც ნიკა გვარამიამ საგანგებო ბრიფინგზე განაცხადა, სტრასბურგის სასამართლო დაჩქარებული წესით შეისწავლის "რუსთავი-2"-ის საქმესთან დაკავშირებით უზენაესი სასამართლოს მიერ მიღებულ გადაწყვეტილებას.
სამაუწყებლო კომპანია "რუსთავი-2" რუსთაველის გამზირზე საპროტესტო აქციებს იწყებს. გეგმა შეთანხმებულია ოპოზიციურ პარტიათა სპექტრთან, რომელთა წარმომადგენლებსაც ნიკა გვარამია ცოტა ხნის წინ შეხვდა.
ნიკა გვარამიამ ახალი საპროტესტო აქციების დაწყება საგანგებო ბრიფინგზე დაანონსა. მისი თქმით, 12 მარტს, 14:00 საათიდან, რუსთაველის გამზირზე აქციები დაიწყება, სადაც მონაწილეობას მიიღებენ არხის სახეები.
ნიკა გვარამიამ განაცხადა, რომ "რუსთავი-2" შეშფოთებით აღიქვამს ყველანაირ საუბრებსა და განცხადებებს ევროკავშირის ქვეყნებში ვიზალიბერალიზაციის პროცესის უკან შექცევის შესახებ.
საპროტესტო აქციების გეგმას მხარს უჭერს პოლიტიკური პარტიებისგან შემდგარი საკოორდინაციო საბჭო, რომელშიც 9 პოლიტიკური გაერთიანება შედის.