2015-10-21 22:38

ჰოლდინგ "აფხაზეთის ხმაში" შემავალი მედიასაშუალებები სრულ მხარდაჭერას უცხადებენ "რუსთავი-2"-ს სიტყვის თავისუფლების მხარდასაჭერ ბრძოლაში და ხვალიდან "რუსთავი-2"-ის მხარდამჭერ აქციებს უერთდებიან.

ამასთან, "აფხაზეთის ხმა" მიიჩნევს, რომ ხელისუფლებამ თავისი გაუაზრებელი ნაბიჯებით თავისუფალი მედიის, კონკრეტულად, "რუსთავი-2"-ის წინააღმდეგ, უკვე მიიყვანა საქმე იმ კონდიციამდე, რომლის იქეთაც სამოქალაქო დაპირისპირების კონტურები იკვეთება. 

"აფხაზეთის ხმა" დაუშვებლად მიიჩნევს ხელისუფლების ან ხელისუფლებასთან ასოცირებული პირების მხრიდან მედიამფლობელთა და ჟურნალისტთა შანტაჟს, პირადი ცხოვრების ამსახველი კადრების გასაჯაროებით მანიპულირებასა და ოჯახის წევრების უსაფრთხოებაზე მინიშნებას, აცხადებს რა, რომ მსგავსი პრაქტიკა გვაბრუნებს წარსულში, რომელიც საქართველოს უახლესი ისტორიის ლაქაა, ამავე დროს, გვაშორებს საქართველოს მოსახლეობის უმრავლესობის მხრიდან ცალსახად გაცხადებულ მიზანს: ევროპულ და ევროატლანტიკურ სტრუქტურებში ინტეგრაციას.

იმ პირობებში, როცა ქვეყანაში ხელისუფლებასთან ასოცირებული ორგანიზაციები, ხშირად თავად ხელისუფლების წარმომადგენლებიც კი აქციებს უწყობენ საკონსტიტუციო სასამართლოს თავმჯდომარესა და მოსამართლეებს, მოუწოდებენ ძალადობისა და "სახლების, ოფისების გადაბუგვისკენ", ქალაქის მერი და სხვა პასუხისმგებელი სახელმწიფო თანამდებობის პირები ესწრებიან ქუჩაში სექსუალური ძალადობის ამსახველი კადრების ჩვენებას, იმ პირობებში, როცა ყველაფერი კეთდება მედიაპლურარიზმის ჩასახშობად, ხელისუფლება, ნებსით თუ უნებლიედ, ხელს უწყობს, რომ პროცესი უმართავი გახდეს და მან ქუჩაში გადაინაცვლოს.

უერთდება რა "რუსთავი-2"-ის მხარდასაჭერ აქციებს, ჰოლდინგი "აფხაზეთის ხმა" აცხადებს, რომ ნებისმიერი შესაძლო გართულების შემთხვევაში პასუხისმგებლობა დაეკისრება ხელისუფლებას. 

"აფხაზეთის ხმა"