2015-10-17 20:12

"ერთიანი ნაციონალური მოძრაობის" სამეგრელოს რეგიონალური ორგანიზაციის ლიდერი, სამეგრელო-ზემო სვანეთის სამხარეო პოლიციის ყოფილი უფროსი თენგიზ გუნავა NDI-ს კვლევის შედეგების პოლიტიკურ ნაწილს ეხმიანება და წერს, რომ ბოღმით და შურით ქვეყანა არ აშენდება და კვლევამ სწორედ ეს დაადასტურა.

"კვლევა არ გვაძლევს მოდუნების საშუალებას. მინდა საზოგადოებას მივმართო, ჩვენ სრულად ვაცნობიერებთ არსებულ რეალობას, ვგრძნობთ პასუხისმგებლობას როგორც ძლიერი ოპოზიციური მოძრაობა, რომელიც არასდროს გაურბის კრიტიკას, შეცდომების აღიარებას და იღებს პასუხისმგებლობას იმ გაკეთებული საქმეების გამოც, რომელმაც შექმნა თანამედროვე საქართველო მიხეილ სააკაშვილის და მისი გუნდის მუხლჩაუხრელი შრომის ფასად!

მზად ვართ ვითანამშრომლოთ ყველა ჯანსაღად მოაზროვნე, სახელმწიფო ინტერესებზე ორიენტირებულ ოპოზიციურ პარტიასთან და ეს პროცესი უკვე მიმდინარეობს.

ჩვენ მშვიდობიანი და პრინციპული ბრძოლით აუცილებლად შევცვლით ხელისუფლებას!

მთავარი, რაზეც ამ კვლევამ დამაფიქრა, არის ის, რომ საქართველოში აღარასოდეს არ უნდა იყოს შურისძიება, რადგან შურით და ბოღმით ქვეყანას ვერ ააშენებ და ქართული ოცნებასავით დამარცხდები.

ჩვენ ქვეყნის შენება გვინდა.

ამიტომ უარს ვეუბნებით შურისძიებას!"