2015-10-13 22:59

მას შემდეგ, რაც ოდესის საოლქო ადმინისტრაციის ხელმძღვანელმა მიხეილ სააკაშვილმა ოდესჩინაში, კრიჟანოვსკის სასოფლო საბჭოს ხელმძღვანელები მიწების უკანონოდ გასხვისებასა და სარფიანად გაყიდვაში, ასევე ოჯახის წევრებისთვის მიწის ნაკვეთების გადაცემაში დაადანაშაულა, კრიჟანოვსკისა და რამდენიმე სხვა სოფლის მცხოვრებლებმა უკრაინის პრეზიდენტს ოდესიდან სააკაშვილის გაძევება მოსთხოვეს.

წერილს, რომელიც უკრაინის პრეზიდენტთან გაიგზავნა, დღეს თავად მიხეილ სააკაშვილი „ფეისბუქზე“ გამოეხმაურა და ხელისმომწერებს შეახსენა, რომ ოდესაში და ზოგადად, ოდესის ოლქში შეუქცევადი პროცესებია დაწყებული, რომლებსაც ისინი ვერ შეაჩერებენ:

„მე მაცნობეს, რომ მას შემდეგ, რაც კრიჟანოვსკის სასოფლო საბჭოს წევრები ოდესჩინის საუკეთესო მიწების მიტაცებაში ვამხილეთ, მათ წერილი გაუგზავნეს უკრაინის პრეზიდენტს პოროშენკოს, ჩემი აქედან გაძევების მოთხოვნით, „დესტაბილიზაციის გამოწვევის“ გამო. ანუ, სტაბილურობის ერთადერთი პირობააა, რომ მათ მიეცეთ ქურდობის საშუალება და ამის შემდეგ კეთილს ინებებენ და არ ჩამოშლიან უკრაინას.

ამ ელემენტებამდე ვერ დავიდა ის, რომ ახლა 2014 კი არა, 2015 წელია და ოდესაში დაწყებულია შეუქცევადი პროცესები, რომლებსაც ისინი ვერანაირი მუქარის გზით ვერ შეაჩერებენ.

და კიდევ: დაინახეს რა, რომ პროკურატურა ითხოვს კრიჟანოვსკისა და ილიჩევკის საქმეებზე დაპატიმრებები დაიწყოს, კვალის დაფარვის მიზნით, სასოფლო საბჭოს მთელი დოკუმენტაცია მოიპარეს. მე უკვე გავგზავნე შს განყოფილების უფროსი ადგილზე, რათა მომზადდეს საფუძველი სისხლის სამართლის საქმის აღძვრისთვის და ჩინოვნიკები ვაიძულოთ, დააბრუნონ მოპარული დოკუმენტაცია ადგილზე“, - წერს მიხეილ სააკაშვილი.

დღეს ცნობილი გახდა ისიც, რომ კრიჟანოვსკში ოდესიდსან ჩასული შსს-ს წარმომადგენლები მთელი რის განმავლობაში ჩხრეკდნენ სასოფლო საბჭოს წევრების საცხოვრებელ სახლებს. პროცესი ინციდენტის გარეშე დასრულდა.