2015-10-06 00:43

ბათუმში დაკავებული "ერთიანი ნაციონალური მოძრაობის" წევრის რეზო ხარაზის მეგობრები მიიჩნევენ, რომ ის პოლიტიკური ნიშნით დააკავეს და რაც ხდება, "ქუთაისის ამბების გაგრძელებაა". 

პარტიის წევრები გრიბოედოვის ქუჩაზე, უშიშროების სამსახურის შენობასთან არიან შეკრებილები და რეზო ხარაზის გათავისუფლებას ელოდებიან. 

როგორც "ნაციონალური მოძრობის" წევრმა სოლომონ ბაჯელიძემ განაცხადა, რეზო ხარაზი იმ დროს დააკავეს, როცა მის დახმარებას და იმის გარკვევას ცდილობდა, თუ რისთვის ჩამოართვეს მართვის მოწმობა. ბაჯელიძის განმარტებით, საქმე ეხება გუშინ მომხდარ ფაქტს, როცა ზებრაზე ქვეითად მოსიარულეს გზა დაუთმო, თუმცა პოლიციის უფროსის მოადგილემ ეს ფაქტი არჩილ ხაბაძის ესკორტის შეფერხებად მიიჩნია.

"გუშინ, ზებრაზე გავაჩერე ავტომობილი და ფეხით მოსიარულეს დავუთმე გზა. ამ დროს მოძაობის წესების დარღვევით, "პროტივზე" გამოსული არჩილ ხაბაძის ესკორტი ჩემი მანქანის უკან გაჩერდა. ზებრაზე ავტომობილის გაჩერება ჩამითვალეს ესკორტის შეფერხებად, მიკროფონებში ჩაჰყვირეს, რანაირად მოძრაობო. გუშინ საღამოსაც და დღესაც ჩვეულებრივად გადავადგილდებოდი.

დღეს მთავრობის სახლთან რომ შევუხვიე, საპატრულო პოლიციის უფროსის მოადგილე დამხვდა და მითხრა, გადმოცემული ხართ და გააჩერეთ ავტომობილიო. რა თქმა უნდა დავემორჩილე. მითხრა, რომ ესკორტის შეფერხებისთვის ერთი წლით ავტომობილის მართვის უფლება ჩამომერთმეოდა.

დავურეკე რეზო ხარაზს, მოვიდა ადგილზე და საპატრულო პოლიციის უფროსს ჰკითხა, თუ რის გამო ჩამომართვა მოწმობა. ეს ქმედება საპატრულო პოლიციის უფროსის მოადგილემ ჩაუთვალა ხულიგნობად თუ პოლიციისთვის წინააღმდეგობის გაწევად და საპატრულო ეკიპაჟებს მოუწოდა დაეკავებინათ ის", - აღნიშნა სოლომონ ბაჯელიძემ. 

"ინტერპრესნიუსის" მიხედვით