2015-10-03 11:52

ნარკოტიკული ნივთიერების ზეგავლენის ქვეშ ყოფნის ბრალდებით დაკავებული გეგა გობეჯიშვილის გამოშვებამდე რეზი არველაძე უარს ამბობს რეგისტრაციამდე. მას მხარდაჭერას უცხადებს დელეგატთა ნაწილიც.

"ჩემი პოზიცია იგივე რჩება - ველოდები გეგა გობეჯიშვილის გამოშვებას. დელეგატთა უმრავლესობა მხარს მიჭერს და არ გადის რეგისტრაციას სანამ გეგას არ გამოუშვებენ", - წერს რეზი არველაძე "ფეისბუქში"

ყრილობა 11:00 საათზე უნდა დაწყებულიყო, თუმცა ამ დრომდე დელეგატების და კანიდატების იმ დარბაზში შეშვებაც არ დაწყებულა, სადაც არჩევნები უნდა გაიმართოს.

დარბაზში ამ დრომდე იმყოფებიან ენერგეტიკის მინისტრი კახა კალაძე და სპორტისა და ახალგაზრდობის მინისტრი ტარიელ ხეჩიკაშვილი.
უეფა-ს ვიცე-პრეზიდენტი გრიგორი სურკისი კი სხვა დარბაზში სავარაუდოდ, რევაზ არველაძეს ხვდება. თუ რის გამო არ იწყება საარჩევნო ყრილობა ამ დრომდე ოფიციალური კომენტარი არ გაკეთებულა. 

ფეხბურთის ფედერაციის პრეზიდენტობისთვის სამი კანდიდატი იბრძვის: რევაზ არველაძე, ლევან კობიაშვილი და მამუკა კვარაცხელია. ფედერაციის პრეზიდენტი 4 წლის ვადით ირჩევა. 

სასტუმრო "ჰოლიდეი ინნთან" ლევან კობიაშვილის მხარდამჭერი და რეზი არველაძის საწინააღმდეგო აქცია მიმდინარეობს. აქციის მონაწილეებისგან ისმის შეძახილები - "ქართული ფეხბურთი არველაძეების გარეშე" და "გაუმარჯოს ქართულ ფეხბურთს კობიაშვილთან ერთად".