2014-04-26 18:59

შსს-მ კიბერდანაშაულის ბრალდებით დავით იაშვილი დააკავა, რომელმაც, ისარგებლა რა „საქართველოს ლატარიის კომპანიის“ შესაბამის სერვერზე წვდომის უფლებით (ის ამ კომპანიის სპეციალისტი იყო), შექმნა უნიკალური კოდის ყალბი ბილეთი, რის შემდეგაც ჯეკპოტი გათამაშებულად გამოცხადდა.

დავით იაშვილმა დანაშაული 19 აპრილს ჩაიდინა, თუმცა „საქართველოს ლატარიის კომპანიის“ შესაბამისმა სამსახურმა სერვერზე უნებართვო შესვლა დააფიქსირა და შესაბამის ორგანოებს აცნობა, რის შედეგადაც დავით იაშვილი დააკავეს.

გამოძიებამ დაადგინა, რომ ყალბი ბილეთის შექმნის გზით დავით იაშვილმა ჯეკპოტის 561.176 ლარის მოგება დააფიქსირა და ის მოქალაქე სოფიო კ-სთან შეთანხმებით მოქმედებდა, რომელმაც  26 აპრილს თავი ჯეკპოტის მფლობელად, ანუ გამარჯვებული ბილეთის პატრონად წარმოადგინა.

„საქართველოს ლატარიის კომპანიის“ წარმომადგენლის განცხადებით, 561.176 ლარი მომდევნო გათამაშების საპრიზო თანხაში გადავა.