2014-04-26 13:38

უკრაინის პრეზიდენტის მოვალეობის შემსრულებელმა, ალექსანდრე ტურჩინოვმა, ქვეყნის უსაფრთხოების სამსახურსა და შინაგან საქმეთა სამინისტროს დაავალა უზრუნველყონ ჟურნალისტების უსაფრთხოება.

ამის შესახებ ნათქვამია პრეზიდენტის ოფიციალურ საიტზე. „პრეზიდენტის მოვალეობის შემსრულებელმა და უმაღლესი რადას თავჯდომარემ, ალექსანდრე ტურჩინოვმა, ქვეყნის უსაფრთხოების სამსახურსა და შინაგან საქმეთა სამინისტროს დაავალა უზრუნველყონ ჟურნალისტების უსაფრთხოება, ასევე აღმოსავლეთ უკრაინაში, ანტიტერორისტული ოპერაციის ფარგლებში, უკრაინული ტელეარხების უწყვეტი ტრანსლირება“-ნათქვმია პრეზიდენტის განცხადებაში.

ამასთან ერთად, ტურჩინოვმა შინაგან საქმეთა სამინისტროსა და ტელევიზიისა და რადიოკომიტეტს დაავალა „მიიღონ ზომები აღმოსავლეთ უკრაინის რეგიონებში ეროვნული სამაუწყებლო აუდიოვიზუალური პროდუქციის უწყვეტი მაუწყებლობისთვის“ იქ, სადაც ამ წუთებში მიმდინარეობს ძალისმიერი სპეცოპერაცია სეპარატისტების წინააღმდეგ.

დღეს გახდა ცნობილი, რომ რუსული ტელეარხების რედაქტორებმა, ხელი მოაწერეს მიმართვას საერთაშორისო ორგანიზაციებისადმი, მათ შორის გაეროსა და ეუთოსადმი, რომელშიც ითხოვენ უკრაინაში მომუშავე ჟურნალისტების უფლებებისა და თავისუფლების დაცვას.