-
2014-04-25 23:21
გადაცემა „რეაქციაში“ ჩართვის დროს კახა ბენდუქიძემ განაცხადა, რომ ბოლო პერიოდში პროკურატურის გააქტიურებაზე და მისი მხრიდან პოლიტიკური სარჩულით დევნაზე უკვე არც მთავრობის წევრებს აქვთ განსხვავებული აზრი.
„მოხდება - მოხდება, რა ვქნა ახლა...“, - ასე უპასუხა მან გადაცემის წამყვანის შეკითხვას იმის შესახებ, თვლის თუ არა, რომ შესაზლოა, მისი დაპატიმრებაც მოხდეს, ხოლო შემდეგ შეკითხვაზე, თუ რატომ უნდა იყოს პროკურატურა მისით დაინტერესებული, კახა ბენდუქიძემ უპასუხა:
„რითია გამოწვეული, არ ვიცი, შეიძლება, ისინი ფიქრობენ, რომ მე ტონობით ფული მიმაქვს „ნაციონალურ მოძრაობაში“, ან ჰგონიათ, რომ მე სტუდენტებს ვზრდი ამ ხელისუფლების მიმართ სიძულვილით - მე ხომ არ ვიცი, რა წარმოდგენა აქვთ მათ ჩემზე...
პროკურატურა გააქტიურებული იყო მთელი ეს პერიოდი და ამ მხრივ განსხვავებული აზრი არ არის არსად, მათ შორის არც მთავრობაში.
დავაკვირდეთ, რას ამბობენ მთავრობის წევრები, ისინი, ფაქტობრივად, ამბობენ: ჩვენ დავპირდით ხალხს, გამოვიძიოთ წინა ხელისუფლებასთან კავშირში მყოფი ადამიანების საქმეები, მაგრამ არ გამოვიძიოთ იმ ადამიანების საქმეები, რომლებიც ადრე იყვნენ წინა ხელისუფლებაში და ახლა ჩვენთან არიან...
რატომ ხდება ეს დაინტერესება მაინცდამაინც ჩემს მიმართ, მოდით, ერთად ვიფიქროთ... წინა პრემიერმა ისიც კი თქვა, საერთოდ გამოსაძიებელია, რასა ასწავლის ის მანდო...“, - თქვა "რეაქციაში" კახა ბენდუქიძემ.