2014-03-22 01:49

როგორც „აფხაზეთის ხმისთვის“ გახდა ცნობილი, მოსკოვის ოლქის ქალაქ ფრიაზინოში ხელჩართული ჩხუბის დროს ცნობილი გაგრელი „კანონიერი ქურდი“ ლაშა ჯოლოგუა მოკლეს. ჩხუბში მთვრალი მამაკაცები მონაწილეობდნენ და თავად ჯოლოგუაც ნასვამი იყო.

ჯერჯერობით არ კონკრეტდება დეტალები და ის, თუ რა სახის დაზიანება მიიღო მოკლულმა, მაგრამ არსებული ინფორმაციით, პოლიციამ უკვე დააკავა 52 წლის მამაკაცი, რომელიც ჩხუბში მონაწილეობდა და მკვლელობაშია ეჭვმიტანილი. დაკავებულმა დანაშაული აღიარა.

გარდაცვლილ ლაშა ჯოლოგუას 1966 წელს დაბადებული რუსეთის მოქალაქის პასპორტი აღმოაჩნდა, თუმცა, მალევე გაირკვა, რომ ის ყალბია. ჯოლოგუა კრიმინალურ სამყაროში ერთერთ ავტორიტეტულ „კანონიერ ქურდადაა“ მიჩნეული და „კანონების“ განუხრელად დამცველის იმიჯი აქვს.

პოლიციის ცნობებში ლაშა ჯოლოგუა ბოლოს 2010 წელს მოხვდა, როცა მოსკოვის ერთერთ რესტორანში დააკავეს და 22 გრამი ნარკოტიკული საშუალება ჰაშიში აღმოუჩინეს.